استانادا جاڭا دراما تەاترى سالىنادى

استانا. قازاقپارات - استانا قاليبەك قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ كوركەمدىك جەتەكشىسى تالعات تەمەنوۆ استانادا جاڭا دراما تەاترى سالىناتىنىن جەتكىزدى.

 بۇل جوبا ەلباسىنىڭ «رۋحاني جاڭعىرۋ» باعدارلاماسى نەگىزىندە جۇزەگە اسپاق. ماكسيم گوركي اتىنداعى ورىس دراما تەاترىندا دا بيىل وزگەرىستەر بار. استاناداعى قازاق دراما تەاترىندا شەكسپيردىڭ «وتەللاسىنىڭ» تۇساۋكەسەرى وتەدى. كوركەمدىك جەتەكشى ناۋرىز ايىندا بولاتىن قويىلىمعا دايىندالىپ جاتىر.

 تالعات تەمەنوۆ، ق. قۋانىشبايەۆ اتىنداعى دراما تەاترىنىڭ كوركەمدىك جەتەكشىسى:

 -  دراماتۋرگيا دەگەندە، شەكسپير ءبىرىنشى ورىندا تۇرادى. ونىڭ شىعارمالارىنىڭ ىشىندە ادامي قاسيەتتەردى كوتەرەتىن تۋىندى -  «وتەللا». بۇل -  سيرەك قويىلاتىن شىعارما. قازاقستاندا شەكسپير بولۋى مۇمكىن، ءبىراق «وتەللا» جوق. ءتىپتى رەسەيدىڭ قالالارىندا دا جوق. ءبىر- ەكى تەاتردا بولعان، ءبىراق ءتۇسىپ قالىپ وتىر، ياعني سيرەك قويىلادى. ويتكەنى ماتەريالى وتە اۋىر.

 بيىل قاليبەك قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى 26-ماۋسىمىن اشتى. وندا ىرىمكەش ومارحانوۆا، گۇلجان اسپەتوۆا، تىلەكتەس مەيراموۆ سياقتى ونەر مايتالماندارى باستاعان 65 اكتەر ەڭبەك ەتىپ جاتىر. تەاتر ۇجىمى ەلىمىزدە عانا ەمەس، ت م د مەن ەۋروپا ەلدەرىنە گاسترولدىق ساپارمەن بارىپ تۇرادى. وسىدان ەكى جىل بۇرىن ماسكەۋدە وتكەن حالىقارالىق «التىن الىپ» فەستيۆالىندە باس جۇلدەنى يەلەندى.

 بولات ىبىرايەۆ، اكتەر:

-  ۇجىمدا 10-15 شاقتى ادام بولدى. حالىققا تەاتردى تانىستىرۋ كەرەك بولدى. ول ءۇشىن ۇلتتىق دۇنيەلەردى قويىپ، حالىقتى تارتۋ قاجەت. ۇلكەن ەڭبەكتى تالاپ ەتتى. تەاتر اشۋ وڭاي ەمەس. ءبىز كەلگەندە، قازاقتاردىڭ سانى از بولدى. سول 10 شاقتى اكتەر عابيت مۇسىرەپوۆتىڭ «اقان سەرى اقتوقتى» سپەكتاكلىمەن تەاتردىڭ العاشقى شىمىلدىعىن اشقان ەدى. ونىڭ باسىندا قازاقتىڭ ەڭبەك سىڭىرگەن قايراتكەرى، رەجيسسەر جاقىپ وماروۆ تۇردى.

 تەاتر 26 جىلدىڭ ىشىندە ونەر ورداسىنىڭ قارا شاڭىراعىنا اينالىپ ۇلگەردى. ال استاناداعى ورىس دراما تەاترىنىڭ 117 جىلدىق تاريحى بار.

 ەركىن قاسەنوۆ، م. گوركيي اتىنداعى دراما تەاترىنىڭ ديرەكتورى:

 -  مەن 11 جىل بۇرىن جۇمىسقا كەلگەندە، ۆاحتادا كەڭەس دەگەن ۇلكەن كىسى بولدى. بالا كەزىنەن وسى تەاتردا جۇمىس ىستەپتى. بالا كۇنىندە ءبىزدىڭ جەرتولەدەن شىعاتىن جول بولعان ەكەن. سونىڭ اۋزىن تاسپەن اشقانىن كورگەن. سول جول كەنەسارى مەن بەيبىتشىلىك كوشەلەرىنىڭ قيىلىسىنداعى استانا ساۋدا ورتالىعىنا شىعادى دەيدى. ول دا -  تاريحي مەكەمە، سول كەزدە بار عيمارات.

 اقمولا استانا بولعان كەزدە ورىس تەاترى قالاداعى ەڭ كورىكتى عيماراتتاردىڭ ءبىرى بولعان. ءتىپتى مۇندا ەڭ العاشقى رەفەرەندۋم مەن سايلاۋ وتكەن. 35 اكتەردان تۇراتىن شىعارماشىلىق ۇجىم جاقىندا «ءاللاديننىڭ سيقىرلى شامى» اتتى قويىلىمدى كورەرمەننىڭ نازارىنا ۇسىنادى.

www.24.kz