بۋرابايدا قانداي نىساندار سالىنادى؟
وبلىس اكىمىنىڭ ورىنباسارى ۆاسيلي كرىلوۆتىڭ ايتۋىنشا، الداعى ۋاقىتتا ۇلكەن جانە كىشى شاباقتى كولى ماڭايىندا تاۋ-شاڭعى كەشەنىن سالۋ جوسپارلانىپ وتىر. تراسسانىڭ ۇزىندىعى - 2200 مەتر. سول جەردە بارلىق كوممۋنيكاتسيالار سالىنادى. ال سارىبۇلاق ەلدى مەكەنىندە ەتنواۋىل اشىلادى. سەبەبى شەتەلدىك تۋريستەر قازاق حالقىنىڭ تۇرمىس سالتىنا قاتتى قىزىعادى. بۋرابايدىڭ اكىمشىلىك ورتالىعى - شۋچينسك قالاسىندا دا ءبىرقاتار نىساندار سالىنادى دەگەن جوسپار بار.
«بىلتىر گولفقا ارنالعان كاسىبي ورتالىق اشىلدى. گولف الاڭىنىڭ ۇزىندىعى - 6000 مەتر. بيىل مامىر ايىندا رەسپۋبليكالىق شاڭعى بازاسى پايدالانۋعا بەرىلەدى. ول جەردە بياتلون الاڭى مەن شاڭعى تراسساسى بولادى. سپورتشىلاردىڭ ءجۇرىپ-تۇرۋىنا ارنالعان بارلىق نىساندار بوي كوتەرەدى. سونىڭ ارقاسىندا ۇلكەن حالىقارالىق جارىستاردى وتكىزىپ، تۋريستەردى كوپتەپ تارتۋعا مۇمكىندىك اشىلادى»، - دەدى ۆ. كرىلوۆ بۇگىن شۋچينسك- بۋراباي كۋرورتتىق ايماعىن دامىتۋ ماسەلەلەرىنە ارنالعان جيىندا.
ونىڭ ايتۋىنشا، بۇگىندە شۋچينسكتە تاعى ءبىر تاۋ-شاڭعى كەشەنىن سالۋ ماسەلەسى قارالىپ جاتىر. ول جەردە فۋنيكۋلەر قاتىنايدى. اتالعان جوبا ينۆەستيتسيالىق ۇسىنىستاردىڭ نەگىزىندە جۇزەگە اسپاق.
«ال جەرگىلىكتى بيۋدجەتتىڭ ەسەبىنەن قالانىڭ ورتالىعىندا كوپفۋنكتسيونالدى سپورت كەشەنىنىڭ قۇرىلىسى باستالادى. ءبىز فورۋم-ورتالىعىن سالۋ جۇمىستارىنا دا ۇلكەن ءمان بەرىپ وتىرمىز. اتالعان نىسان ءۇش سەگمەنتتەن تۇرادى. ول جەردە كورمە كەشەنى، كونتسەرت زالى مەن زاماناۋي كونگرەسس-حول بولادى. قازىرگى كەزدە جەر ۋچاسكەسى انىقتالدى. ەندى، جوبالاۋ جۇمىستارىنا كىرىسۋ كەرەك»، - دەپ اتاپ كورسەتتى اكىمنىڭ ورىنباسارى.
ال ق ر مادەنيەت جانە سپورت ءمينيسترى ارىستانبەك مۇحامەدي ۇلىنىڭ سوزىنە قاراعاندا، تاعى ءبىر حالىقارالىق كومپانيا بۋرابايدا بەس جۇلدىزدى قوناق ءۇيدى تۇرعىزۋعا مۇدەلى.
«ەندى، ءدال قازىر ءبارىن ايتا المايمىن، ءبىراق ءبىر حالىقارالىق كومپانيا بۋرابايدا بەس جۇلدىزدى قوناق ءۇيدى سالاتىن بولادى. ول Marriot نەمەسە Four Seasons سياقتى ۇلكەن برەندكە اينالماق. ءسويتىپ، كۋرورتتا تاعى ءبىر بەس جۇلدىزدى قوناق ءۇيدىڭ قۇرىلىسى باستالادى»، - دەدى ا. مۇحامەدي ۇلى جۋرناليستەرگە بەرگەن سۇحباتىندا.
اۆتور: ارمان اسقاروۆ
