تانىمال رەجيسسەر جاپپاي كينو تۇسىرۋگە كوشكەن قازاقستاندىق انشىلەردى سىناپ تاستادى
ونەر جولىنداعى كاسىبىمەن قاتار، كينونارىققا قول سوزعان تانىمالداردىڭ تۋىندىلارى تۋرالى رەجيسسەردىڭ ءوز ايتارى بار!
بۇل تۋرالى ن ت ك ارناسىنىڭ «رەۆيۋ» باعدارلاماسىندا ايتىلدى.
«تەك جالقاۋ عانا كينو تۇسىرمەيتىن بولدى بىزدە. ءبارى كينوعا اۋىپ كەتتى. بۇل كينو ەمەس، بۇل جاي عانا مازاق. مۇنى امەريكالىقتار «ينتەرتەيمەنت» دەيدى. بىرەۋلەرگە ەرمەك، بىرەۋلەر اقشا قۋالاپ جۇرەدى، وڭاي اقشا دەپ... كورەرمەننىڭ ناداندىعىن بىلە وتىرىپ، قالتالارىن اقتارىپ وتىرادى. مەنىڭشە بۇل وتە قاۋىپتى نارسە. مادەنيەتىمىزدى تومەندەتىپ، سانامىزدى بۇزادى»، - دەيدى ەرمەك تۇرسىنوۆ.
بۇل قازاق كينوسىنىڭ بولاشاعىنا باس اۋىرتقان ەرمەك تۇرسىنوۆتىڭ جان-ايقايى. ول، تالانتتى اكتەرلار مەن كاسىبي رەجيسسەرلاردىڭ نانىنا ورتاقتاسقان وزگە ونەر وكىلدەرىنىڭ تىرلىگىن تۇسىنە الار ەمەس.
«مەن ماسەلەن ساحناعا شىعىپ ولەڭ ايتپايمىن عوي. نەمەسە كينو تۇسىرسەم كادرعا كىرىپ، مەنىڭ ارتىستىك قابىلەتىم جوق. مەن ونى بىلەمىن، سەزەمىن دە ءوزىم كادرعا كىرمەيمىن. بۇل ماعان بوتەن نارسە. بۇلار قورىقپايدى. قالاي قورىقپايدى؟ مەن سوعان تاڭقالامىن دا»، - دەيدى رەجيسسەر.
ءيا، بۇگىندە بۇل ءۇردىس وتاندىق كينويندۋستريادا بەلەڭ الىپ تۇر. ماسەلەن، ءانشى بۇركىت وتكەن جىلدىڭ سوڭىندا دەبيۋتتىك كارتيناسىن قالىڭ كوپشىلىككە ۇسىنىپ، ءوزىنىڭ رەجيسسەرلىق قىرىن تانىتقان بولاتىن.
«ويلايدى وسى انشىلەر ەستراداعا دا بارادى، كينوعا دا بارادى، وسىلاردان باسقا ەشكىم جوق پا دەگەندەي. جوق، بۇل ءوزىمنىڭ جان-دۇنيەمنىڭ تالابى. مىسالعا، ءبىز كينو ءتۇسىرىپ جاتساق وعان ءبىز اقشا قۇيىپ جاتىرمىز. جۇمىس ورىندارى مەن اكتەرلارعا جۇمىس بەرىپ جاتىرمىز»، - دەيدى بۇركىت.
«ادام ەگەر ءوز-وزىنە وبەكتيۆتى كوزبەن قاراسا، شىن كوزىمەن. ەگەر ءوز-ءوزىن الداماسا، مەن كينو تۇسىرە الامىن با، كينو تۇسىرگەندە مەن ءبىر اقيقاتتى ىزدەپ ءجۇرىپ، وسى اقيقاتتى ەلگە تاراتىپ ايتا الامىن با، ونداي حاقىم بار ما، دەگەن سۇراقتاردى وزىنە قويا السا، تۇسىرمەس بۇرىن... وندا اپتا سايىن بىزدەردە كينو شىقپايتىن ەدى»، - دەيدى ەرمەك تۇرسىنوۆ.
ءار كينوتۋىندىسىن وي ەلەگىنەن وتكىزىپ، تالعاپ تاسپالايتىن تۇرسىنوۆ، وسى جىلى «كينومەحانيك» اتتى جاڭا كارتيناسىنىڭ تۇساۋىن كەسۋگە نيەتتى.
