بەكمامبەتوۆتەر كينو ءتۇسىرۋ ءۇشىن قازاقستانعا نەگە كەلمەيدى
ءمينيستردىڭ ايتۋىنشا، بۇگىندە كينو سالاسىنداعى شەتەلدىك كومپانيالار الدىمەن ينۆەستيتسيالاردىڭ قاۋىپسىزدىگىن تالاپ ەتەدى. ال قازاقستاندا اتالعان ماسەلەنى رەتتەيتىن زاڭناما دا جوق.
«قازىرگى ۋاقىتتا ءبىز پارلامەنتتە كينو سالاسىنداعى ءبىرىنشى زاڭدى قابىلدايىق دەپ جاتىرمىز. نەگە دەسەڭىز، ينۆەستورلار كەلگەندە ءبىز ولاردىڭ ءاربىر قادامىن زاڭمەن بەكىتۋىمىز كەرەك. كىم قانداي شاراعا جاۋاپتى؟ ول كىسىلەر ينۆەستيتسيا الىپ كەلگەندە اقشانىڭ قاۋىپسىزدىگىنە كىم جاۋاپ بەرەدى؟ ناقتى قاي مەملەكەتتىك ورگانعا جۇگىنۋگە بولادى؟ سونىڭ ءبارىن ءبىز جاڭاعى زاڭدا جازىپ بەرەمىز. سوندا شەتەلدىك كومپانيالار قازاقستانعا كەلۋگە ىنتا بىلدىرەدى. قازىر ولار قالاي كەلەدى؟ قازاقستاندا «كينو تۋرالى» زاڭ دا جوق. مىسالى، وزدەرىڭىز بىلەسىزدەر، «ماركو پولو» فيلمىن كورسەتتى. ءار ازامات كەلەدى دە، مەن ساعان كومەكتەسەمىن دەيدى. سوسىن اقشانى الىپ، جوق بولىپ كەتەدى. ولار كىمدى، قايدان ىزدەيمىز، دەيدى. سول سەبەپتى شەتەلدىك كومپانيالار كەلگەندە الدىمەن ينۆەستيتسيانىڭ قاۋىپسىزدىگىنە الاڭدايدى. ناقتى ورگاننىڭ بولعانىن قالايدى» ، - دەدى ا. مۇحامەدي ۇلى جۋرناليستەرگە بەرگەن سۇحباتىندا.
ءمينيستردىڭ سوزىنە قاراعاندا، تانىمال كينولار تۇسىرىلگەن جەرلەرگە تۋريستەر كوپتەپ بارادى. ماسەلەن، «اۆاتار» فيلمىنەن كەيىن جاڭا زەلانديانىڭ تۋريستەرى ارتا ءتۇستى. سول سياقتى «گارري پوتتەر» كارتيناسى لوندوننىڭ بەدەلىن كوتەردى.
« ءبىزدىڭ دە ماقساتىمىز سول. Paramount Pictures سياقتى حالىقارالىق كينوكومپانيا قازاقستان تۋرالى فيلم تۇسىرسە، ارينە، دۇنيەجۇزى قازاق جەرىن كورۋگە اسىعادى. جاقىندا Universal studio كومپانياسىنىڭ وكىلدەرى كەلىپ كەتتى. ولار قازاقستاندى كورىپ، كينو ءتۇسىرۋ بويىنشا قانداي مۇمكىندىكتەردىڭ بار ەكەنىن كوردى. ارينە، ءبىز دە ءبارىن كورسەتتىك. ولاردىڭ بەرگەن باعالارى وتە جوعارى» ، - دەپ اتاپ كورسەتتى ا. مۇحامەدي ۇلى.
