اقتوبەلىك كاسىپكەر بۇقتىرىلعان ەتتى ساتۋ ءۇشىن الەۋمەتتىك جەلىگە جۇگىنەتىنىن جاسىرمادى

اقتوبە. قازاقپارات - اقتوبەلىك كاسىپكەر سامات قالدىعۇلوۆ بۇقتىرىلعان سەح ءونىمىن ساتا الماي وتىر.

ول ادامدارعا ۇسىنعانىمەن، كوبى باعاسى قىمبات دەپ باس تارتاتىنىن جاسىرمادى، دەپ حابارلايدى قازاقپارات ءتىلشىسى.

اقتوبەدەگى «ايبەك» شارۋا قوجالىعى وتكەن جىلى بۇقتىرىلعان ەت شىعاراتىن سەحتى ىسكە قوستى. جوبا قۇنى - 500 ميلليون تەڭگە. قازىر مۇندا سيىر، قوي، جىلقى ەتى مەن سيىر ەتى قوسىلعان كۇرىش، اسبۇرشاق، قاراقۇمىق شىعارىلادى. ىشكى نارىققا ساتۋعا شىعارىلعان ءونىم سۇرانىسقا يە بولمادى. سەبەبى، باعا وزگە بۇقتىرىلعان ەتكە قاراعاندا قىمبات. كاسىپكەر تازا، ادال ءونىم باعاسىنىڭ ارزان بولمايتىنىن العا تارتىپ وتىر.

«ءبىز تازا ءونىم شىعارامىز. بۇقتىرىلعان ەت ىشىندە قوسپا جوق، باعا جوعارى. قالبىرعا ءونىم سالماعى 325 گرام بولسا، ونىڭ 287 گرام تازا ەت. ەتتى ءوز شارۋاشىلىعىمىزدان الامىز. جان-جاعىمىزدا 17 شارۋاشىلىق جۇمىس ىستەپ تۇر. ەت كلاستەرىن دامىتىپ وتىرمىز. مالدى بورداقىلايمىز، سويىپ، ساتامىز. ال سەحتىڭ قۇرال- جابدىعى پولشادان اكەلىندى. اۆتوماتتى قۇرىلعى 1 مينۋتتا 120 قالبىرعا تۇز، بۇرىش، مايىن، ەتىن سالىپ ۇلگەرەدى»، - دەدى كاسىپكەر سامات قالدىعۇلوۆ.

كاسىپكەر جاڭا جوبانى ىسكە اسىرعان كەزدە ءونىمنىڭ سۇرانىسقا يە بولاتىنىنا سەنىمدى بولدى. ءبىراق ءۇمىت اقتالمادى. ءالى دە سۇرانىس از.

«ادامدار قالبىردىڭ ىشىندە نە بار ەكەن دەپ كۇمانمەن قارايدى. سوندىقتان الەۋمەتتىك جەلىنى پايدالانىپ، جارنامالاۋعا شىقتىق. ساپاسىنا سىن ايتقان ەشكىم بولمادى. قازىر رەسەيگە تاسىمالداپ جاتىرمىز. جىلىنا 200 مىڭ دانا ءونىم جىبەرە الامىز. ماسكەۋ، ورىنبور، چەليابىگە دە جىبەرەمىز. ءبىر اۋىسىمدا 48 مىڭ دانا ءونىم شىعارا الامىز. ازىرگە سەح تولىق قۋاتتىلىقتا جۇمىس ىستەپ تۇرعان جوق»، - دەدى سامات قالدىعۇلوۆ.

اقتوبەگە جۇمىس ساپارى كەزىندە اۋىل شارۋاشىلىعى ءمينيسترى ءومىرزاق شوكەيەۆ سەح ونىمىمەن تانىستى. كاسىپكەر ءونىم نارىعىن ىزدەۋگە كومەكتەسۋدى سۇرادى.