وازيس كوركەم فيلمى پروكاتقا شىعادى - فوتو
«بۇگىنگى قازاق قوعامى تىلدىك، دىندىك تۇرعىدان ەكىگە ءبولىنىپ جاتىر. قازاق قازاقتى تۇسىنبەي جاتىر، بۇل ۇلتىمىزدىڭ تراگەدياسى.
بۇل تراگەديانى ءبىز «وازيس» فيلمىندەگى كەيىپكەرلەرى ارقىلى - دالادا كەزدەسكەن ەكى قازاقتىڭ قاقتىعىسى ارقىلى كورسەتۋگە تىرىستىق. ءبىرى - ءدىنى دە، ءتىلى دە، تاريحى دا بۇزىلماعان، ورالمان جىگىت بولسا، ەكىنشىسى - الماتىداعى بالالار ۇيىندە تاربيەلەنگەن، ءدىنى دە جوق، ءتىلى دە جوق، تاريحي جادى دا جوق رۋسلان ەسىمدى شالا قازاق. جالپى، «وازيس» - ءدىن تاقىرىبىن قوزعاپ، يمانى بۇزىلعان قازاق قوعامى ءۇشىن يماننىڭ قانشالىقتى ماڭىزدى ەكەنىن كينو تىلىمەن ايتۋعا ۇمتىلعان فيلم»، - دەدى فيلمنىڭ سەناري اۆتورى، بەلگىلى جازۋشى سماعۇل ەلۋباي.
«وازيس» فيلمىنىڭ نەگىزگى ءتۇسىرۋ جۇمىستارى الماتى وبلىسى شونجا اۋىلىندا، سونىمەن قاتار الماتى قالاسىندا جۇرگىزىلدى. فيلمدەگى باستى ءرولدى ت. جۇرگەنوۆ اتىنداعى قازاق ۇلتتىق ونەر ينستيتۋتىنىڭ تۇلەگى ايدار اسارباي سومدادى.
ايتا كەتسەك، «وازيس» فيلمى رەجيسسەر بەگارس ەلۋبايدىڭ العاشقى جەكە جۇمىسى. ونىڭ الدىندا ول رەجيسسەر ەرلان نۇرمۇحامبەتوۆپەن بىرگە بالالارعا ارنالعان «اڭشى بالا» فيلمىن (2012 -جىلى جارىققا شىققان) تۇسىرگەن بولاتىن. بۇگىندە رەجيسسەر «بالا عاشىق» اتتى كەلەسى فيلمدى ءتۇسىرىپ جاتىر.
فيلمدە ومىرگە دەگەن كوزقاراستارى ءبىر-بىرىنە ۇقسامايتىن، مىنەزدەرى دە مۇلدەم بولەك ەكى جىگىتتىڭ تاعدىرى باياندالادى. رۋسلان - انانىڭ مەيىرىمىن كورمەگەن تاستاندى بالا. پوليتسيا قىزمەتكەرلەرىنەن قاشىپ جۇرگەن ول وزىمەن بىرگە بۇكىل الەمدى جويىپ جىبەرمەك ويى بولادى. الايدا ءشولدى دالادا ول جۇرەگىندە يمانى بار، توڭىرەگىندەگىلەردى ماحاببات پەن مەيىرىمدىلىك نۇرىنا بولەندىرىپ جۇرگەن جىگىتتى كەزدەستىرەدى.
