استانا كوشەلەرىندەگى كامەرالار ادامنىڭ بەت- الپەتىن تانيتىن بولادى
«وزدەرىڭىز بىلەتىندەي، جوبانىڭ باستى ماقساتى - ءبىزدىڭ ازاماتتاردىڭ قاۋىپسىزدىگى. وسى جۇمىس اياسىندا جوبانى ارى قاراي دامىتىپ، اكىمنىڭ تاپسىرماسى بويىنشا ادامداردىڭ ءتۇرىن تانۋ جۇيەسىن ەنگىزىپ جاتىرمىز. ادامدى تانۋ بويىنشا پيلوتتى رەجىمدەگى بۇگىنگى تەستىلەۋ - بۇكىل قالا بويىنشا كامەرالاردىڭ اۋقىمىن كەڭەيتۋ باعىتىنداعى العاشقى قادام»، - دەدى «قازاقپارات» ح ا ا تىلشىسىنە «استانا Innovation» ا ق باسقارما ءتوراعاسى ولجاس سارتايەۆ.
ىلكى جوبانىڭ العاشقى پۋنكتى رەتىندە قالالىق اكىمدىك تاڭداپ الىنعان. ولجاس سارتايەۆتىڭ ايتۋىنشا، بۇل جۇيەمەن كەلەشەكتە ادام كوپ جۇرەتىن وزگە دە ورىندار قامتىلادى.
«جۋىق ارادا ءبىز بۇل جۇيەنى ادامدار كوپ جينالاتىن بارلىق ورىندارعا ورناتۋدى كوزدەپ وتىرمىز. ەگەر تەستىلەۋ ءساتتى وتكىزىلسە، اتالعان جۇمىس قولعا الىنادى»، - دەيدى «استانا Innovation» ا ق باسشىسى.
ولجاس سارتايەۆ اتالعان شارا اكىمدىكتى ترانسفورماتسيالاۋ اياسىندا جۇرگىزىلىپ جاتقانىن تىلگە تيەك ەتتى.
«ماقساتتاردىڭ ءبىرى - اشىق اكىمدىك. اكىمدىك وسىلايشا تۇرعىندارعا جاقىنداي تۇسەدى»، - دەدى سارتايەۆ.
