ءۇرجاردا بۇركىتشىلەر چەمپيوناتى وتەدى

 وسكەمەن. قازاقپارات - 3-4 - اقپان كۇندەرى شىعىس قازاقستاننىڭ ءۇرجار اۋدانىندا استانانىڭ 20 جىلدىعىنا ارنالعان ەرەسەك بۇركىتشىلەردىڭ ХІІ چەمپيوناتى وتەدى، دەپ حابارلايدى قازاقپارات ءتىلشىسى.

وسىمەن 12- رەت ۇيىمداستىرىلعالى وتىرعان باسەكە ەكىنشى جىل قاتارىنان شىعىس قازاقستاندا وتپەك. وعان 10 وبلىستىڭ قۇسبەگىلەرى قاتىسادى.

«بۇگىننىڭ وزىندە جەتى ءوڭىردىڭ دەلەگاتسياسى كەلىپ ۇلگەردى. جالپى جيىنى 40 بۇركىت، 78 قارشىعا، تۇيعىن، سۇڭقار سياقتى قۇستار باق سىنايدى دەپ كۇتىلۋدە» ، - دەيدى ۇيىمداستىرۋ القاسىنىڭ وكىلى تاتتىمبەت كاپ ۇلى.

اۋداندىق دەنە شىنىقتىرۋ جانە سپورت ءبولىمىنىڭ جەتەكشى مامانى باۋىر ءامىرعالينوۆتىڭ ايتۋىنشا، سايىستىڭ جالپى جۇلدە قورى 500 مىڭ تەڭگەنى قۇراماق. دەگدار ءداستۇرىمىزدى ۇلىقتايتىن بىرىنشىلىك ەكى كۇنگە سوزىلادى دەپ جوسپارلانعان.