ۆيتسە- مينيستر ءبىلىم سالاسىنا قاتىستى تاراعان قاۋەسەتتەرگە جاۋاپ بەردى

استانا. قازاقپارات - قازاقستاندا جوعارى وقۋ ورىندارى سانى تىم كوپ دەگەن پىكىرلەر نەگىزسىز. بۇل تۋرالى جوعارى ءبىلىم بەرۋ جۇيەسىن دامىتۋ تاقىرىبىنداعى دوڭگەلەك ۇستەلدە ءبىلىم جانە عىلىم ۆيتسە- ءمينيسترى اسحات ايماعامبەتوۆ ءمالىم ەتتى، دەپ حابارلايدى قازاقپارات.

«ءبىزدىڭ قوعامدا بىلىمگە قاتىستى ءتۇرلى اڭىزدار ايتىلىپ ءجۇر. قازاقستاندا جوعارى وقۋ ورىندارى تىم كوپ دەگەن پىكىرلەر ءجيى كەزدەسەدى. بىزدە قازىرگى كەزدە 130 ج و و بار. ەگەر دە حالىقتىڭ جان باسىنا شاقساق ءارى جالپى كولەمگە نازار اۋدارساق، وندا فرانسيادا 500-دەن استام، ا ق ش- تا 5 مىڭعا جۋىق، ال بىزدە 130. بۇل تۇرعىدا ابساليۋتتىك كورسەتكىشتەرگە ەمەس، حالىققا شاققانداعى كوەففيسەنتكە قاراعان ابزال. وسى ورايدا بىزدە جوعارى وقۋ ورىندارى سونشالىقتى كوپ ەمەس ەكەنىن بايقايمىز. نەگىزى، ماسەلەنىڭ ءمانى ساندا ەمەس، ساپادا ەكەنىن ءتۇسىنۋ كەرەك»، - دەدى اسحات ايماعامبەتوۆ.

بۇدان كەيىن ول ەلىمىزدەگى ستۋدەنتتەر سانىنا قاتىستى ايتىلىپ جۇرگەن قاۋەسەتتەرگە توقتالدى.

«تاعى بىرەۋلەر بىزدە ستۋدەنتتەر تىم كوپ ەكەنىن العا تارتۋدا. شىندىعىندا، ەلىمىزدەگى ستۋدەنتتەر سانى ەكونوميكالىق ىنتىماقتاستىق جانە دامۋ ۇيىمى ەلدەرىمەن سالىستىرعاندا بىرنەشە از. كەرىسىنشە بۇگىندە بىزگە وسى باعىتتى دامىتۋ كەرەكتىگىن ايتۋدامىز»، - دەپ ويىن ءبىلدىردى ۆيتسە- مينيستر.

سونىمەن قاتار ول قازىرگى كەزدە ءبىلىم سالاسىنا شامادان ارتىق قارجى ءبولىنىپ جاتقاندىعى قوعامدا ءسوز بولعاندىعىنا توقتالدى.

«ناقتىراق ايتقاندا، قارجى جالپى ىشكى ونىمنەن 3 پايىزدان ءسال استام دەڭگەيدە بولىنۋدە. ال ەگەر جوعارى بىلىمگە توقتالساق، وندا ونىڭ ۇلەسى ايتارلىقتاي تومەن. سوندىقتان قوعامدا كوتەرىلىپ جۇرگەن نەگىزگى ماسەلەلەردى بىلەمىز جانە سول باعىتتاردا جۇمىستاردى جالعاستىرۋدامىز»، - دەدى ءمينيستردىڭ ورىنباسارى.

اۆتور: رۋسلان عابباسوۆ