قورجىندارىڭ مەدالعا تولسىن - چەمپيوندار وليمپياداشىلارعا ساتتىلىك تىلەدى
جاقسىلىق ۇشكەمپىروۆ، ماسكەۋ وليمپياداسىنىڭ چەمپيونى:
- ارينە، جازعى وليمپياداداعى جەڭىمپازدار مەن قىسقى وليمپياداداعى جۇلدەگەرلەردى استە سالىستىرۋعا بولمايدى. ءبىراق، ەكەۋى دە ەلدىڭ ابىرويىن اسىراتىن، بايراعىمىزدى جەلبىرەتەتىن، ءانۇرانىمىزدى اۋەلەتەتىن دودا. سوندىقتان، وليمپيادانى قىسقى، جازعى دەپ بولۋگە بولمايدى. ەكەۋى دە ەلىمىز ءۇشىن ماڭىزدى. ءبىز وليمپيادا ارداگەرى بولعاندىقتان بارلىعىنا بىردەي تىلەكشىمىز. پحەنچحانعا بارا جاتقان سپورتشىلارعا مىنا ءبىزدىڭ، ياعني جازعى وليمپياداشىلاردىڭ جولىن بەرسىن. ەڭ باستىسى، ەلدىڭ ابىرويى، مەرەيىمىز تاسىسىن. بارلىعىنا اق جول تىلەيمىن. ساتتىلىك جولداس بولسىن...
باقتيار ارتايەۆ، افينا وليمپياداسىنىڭ چەمپيونى:
- قاي سپورت ءتۇرىن الساق تا، قازاق ەلىندە ەڭ باستىسى سپورتتىق ءداستۇر، تامىرى تەرەڭ مەكتەپ بار. قىسقى وليمپيادا ويىندارىندا ۆلاديمير سميرنوۆ سالعان سارا جول بار. سوندىقتان، قازاق ەلىندە جازعى سپورت تۇرلەرى عانا دامىعان، قىسقى سپورت مۇلدە قالىپ قويعان دەگەن جاڭساق پىكىردەن اۋلاق بولۋىمىز كەرەك شىعار. قازىرگى تاڭدا قىسقى سپورت تۇرلەرى دە جاقسى دامىپ كەلەدى. قىزىعاتىن جاستار دا كوپ. سول ءۇشىن الداعى قىسقى وليمپيادادا سپورتشىلارىمىزدان، ياعني ارىپتەستەرىمىزدەن ۇلكەن ءۇمىت كۇتەمىز. ولارعا تىلەيتىنىم تەك ساتتىلىك. تابىستى ونەر كورسەتىپ، ەلگە امان ەسەن جەتسىن دەگىم كەلەدى.
نۇرباقىت تەڭىزبايەۆ، بەيجىڭ وليمپياداسىنىڭ كۇمىس جۇلدەگەرى:
- جالپى وليمپيادا ويىندارى قىسقى بولسىن، جازعى بولسىن - العا قويعان ماقساتى ءبىر. سول سپورتتاعى مىقتىنى انىقتاۋ، ەلدەر اراسىنداعى ىنتىماقتاستىقتى ارتتىرۋ جانە سپورتتى ناسيحاتتاۋ.
قازىر قازاقستان قۇراماسى وڭتۇسىتك كورەيادا وتەتىن قىسقى وليمپيادا ويىندارىنا اتتانىپ كەتتى. ءوز كەزەگىمدە بارشا سپورتشىلارعا ساتتىلىك تىلەيمىن. سپورتشىنىڭ ءوز ونەرىن كورسەتەتىن ەڭ جوعارعى جارىس دەپ وليپيادا ويىندارىن ايتار ەدىم. كوماندامىز وسى قىسقى وليمپيادادان جۇلدەلى كەلىپ، جانكۇيەرلەرىن قۋانتسا ەكەن دەيمىن. وليمپيادالىق سپورت تۇرلەرىنىڭ باسقا سپورت تۇرلەرىنە قاراعاندا، دايىندىق بارىسى، جارىسقا دايىندالۋى جانە ول وليمپياداعا جولدامانى ۇتىپ الۋى - ۇلكەن ەڭبەكپەن كەلەتىن جەتىستىك. سوندىقتان قىسقى ويىنداردا ونەر كورسەتەتىن سپورتشىلاردىڭ دايىندىعى، قازىرگى قوبالجۋىن جاقسى تۇسىنەمىن. ءوز اتىمنان قىسقى وليمپيادا ويىندارىنا قاتىستاتىن سپورتشىلارعا جەتىستىك تىلەپ، ەلىمىزدىڭ كوك تۋىن جەلبىرەتەدى دەگەن سەنىمدەمىن.
بولات ءجۇمادىلوۆ، وليمپيادا ويىندارىنىڭ ەكى دۇركىن كۇمىس جۇلدەگەرى:
- وليمپيادا ويىندارى دەسە، جۇرەگىمىز الىپ ۇشىپ، باياعى ءوزىمىز سىنعا تۇسكەن ساتتەر كوز الدىمىزعا ەلەستەپ كەتەدى. وليمپيادا - سپورتتىڭ تورەسى. سوندىقتان كورەياعا بارا جاتقان سپورتشىلارىمىزعا تەك ساتتىلىك تىلەيمىن. قورجىندارى مەدالعا تولسىن. ەلىمىزدىڭ بايراعىن بيىكتەن جەلبىرەتسىن. ابىرويىمىزدى اسىرىپ، مەرەيىمىزدى كوتەرسىن. جازعى وليمپياداشىلاردىڭ جەتىستىگى ولارعا دا جۇعىستى بولسىن دەگىم كەلەدى. ولار تۋىمىزدى جەلبىرەتىپ بارىپ، جەلبىرەتىپ ورالسىن. ءبىز ولار ەلگە ورالعاندا بوركىمىزدى اسپانعا اتىپ، اۋەجايدان سالتاناتتى تۇردە قارسى الاتىن كۇن بولسىن...
اۆتور: كۇنسۇلتان وتارباي
