قازاقستان بيۋجەتتىڭ اشىقتىعى بويىنشا الەمدىك رەيتينگتە جوعارى كوتەرىلدى
زەرتتەۋ جۇمىستارىن حالىقارالىق بيۋجەت سەرىكتەستىگى 109 كورسەتكىش بويىنشا الەمنىڭ 115 مەملەكەتىندە جۇرگىزگەن.
قازاقستان بويىنشا زەرتتەۋ جۇرگىزگەن «ساندج» زەرتتەۋ ورتالىعىنىڭ ديرەكتورى جانار جاندوسوۆا قازاقستاننىڭ سوڭعى ەكى جىلدا بيۋجەتتىك اقپاراتقا قولجەتىمدىلىكتى جاقسارتقانىن اتاپ ءوتتى. 2015-جىلى اتالعان رەيتينگ بويىنشا قازاقستان 51 ۇپايعا يە بولسا، 2017-جىلى - 53 ۇپاي جيناعان.
«جالپى الەمدىك دەرەكتەرگە سۇيەنسەك، بيۋجەتتىڭ اشىقتىق يندەكسى ءوسىپ كەلەدى. بيىل رەيتينگ ناتيجەسى بويىنشا ىرگەلەس كورشىلەرىمىز رەسەي - 72 ۇپاي، تۇركيا - 58، قىرعىزستان - 55 جانە گرۋزيا - 82 ۇپاي جيناپ وتىر. قازاقستان 53 ۇپايمەن گوندۋراس جانە نەپال ەلدەرىنىڭ اراسىندا تۇر»، - دەدى جانار جاندوسوۆا استانادا وتكەن باسپا ءسوز ءماسليحاتىندا.
2017-جىلى قازاقستاننىڭ بيۋجەت جوباسىنىڭ تولىقتىعى بويىنشا كورسەتكىشى - 52 ۇپايعا، ىشكى جىلدىق ەسەپ - 89 ۇپايعا، جىلدىڭ ەسەپ كورسەتكىشى - 64 ۇپايعا دەيىن ارتقان. جارتى جىلدىق ەسەپ كورسەتكىشى بويىنشا قازاقستان 37 ۇپايمەن باعالانسا، ازاماتتىق بيۋجەت (ەلدە جۇرگىزىلمەيدى) جانە الەۋمەتتىك-ەكونوميكالىق دامۋ بولجامى (اقپارات تىم كەش جاريالانعان) بويىنشا مۇلدەم ۇپاي الماعان.
بيۋجەتتىك پروتسەسستەرگە قوعامنىڭ قاتىسۋى رەيتينگىندە قازاقستان 100 ۇپايدىڭ 13 ىنە عانا يە بولدى. بيۋجەت شىعىستارىن زاڭنامالىق بيلىك تاراپىنان قاداعالاۋ بويىنشا - 63 ۇپاي جينادى.
قازاقستان پوستكەڭەستىك ەلدەر اراسىندا قىرعىزستاننان (55 ۇپاي)، رەسەيدەن (72 ۇپاي)، ۋكراينا (54 ۇپاي) جانە گرۋزيادان (82 ۇپاي) تومەن تۇر.
بيۋجەت تۋرالى تولىققاندى اقپارات بەرگەن جاڭا زەلانديا (89 ۇپاي)، وڭتۇستىك افريكا (89)، شۆەتسيا (87)، نورۆەگيا (85)، گرۋزيا (82) ەلدەرى رەيتينگتە العاشقى بەستىكتى قۇرادى. ال جەتكىلىكتى اقپارات بەرمەيتىن يەمەن، كاتار، لەسوتو، ۆەنەسۋەلا، نيگەريا سوڭعى قاتاردان كورىندى.
اۆتور: ايجان سەرىكجان قىزى
