ءومىرزاق شوكەيەۆ اقتوبەدەگى جىلىجاي تۋرالى: بۇل تاڭعالارلىق جاعداي

اقتوبە. قازاقپارات - پرەمەر-ءمينيستردىڭ ورىنباسارى-اۋىل شارۋاشىلىعى ءمينيسترى ءومىرزاق شوكەيەۆ ەكى كۇندىك جۇمىس ساپارىمەن اقتوبەگە كەلدى، دەپ حابارلايدى قازاقپارات ءتىلشىسى.

قازاقستاندا تەڭدەسى جوق جىلىجايدى كورگەن ءومىرزاق شوكەيەۆ ءوز تاڭدانىسىن جاسىرمادى. مۇندا قىسى-جازى ءبىر تەمپەراتۋرانى ۇستاپ تۇرۋعا بولادى. ىلعالدى ساقتاۋدىڭ بىرەگەي ءادىسى ارقىلى ءونىمدى ارتتىرۋعا مۇمكىندىك بار. ياعني، ادەتتەگى جىلىجايلاردا قىستا جىلى اۋا جوعارى كوتەرىلىپ، ونى تومەن ءتۇسىرۋ مۇمكىن بولماسا، مۇندا اۋا رەتتەلەدى - پوليەتيلەن قۇبىرىنا سورىلىپ، قايتا اينالىمعا ەنەدى. سونىمەن قاتار، جىلىجايدا گاز ەلەكتر ستانسياسى بار. قازىرگى كەزدە گازدىڭ تەكشە مەترى 15 تەڭگە. ەلەكتر توعىن كومپانيا وزدەرى وندىرەدى. بۇل كوممۋنالدىق شىعىندى ەكى ەسە ارزانداتۋعا مۇمكىندىك بەرەتىن جوبا.

پرەمەر-ءمينيستردىڭ ورىنباسارى-اۋىل شارۋالىعى ءمينيسترى مۇنداي جىلىجايدىڭ استانادا دا جوق ەكەنىن جەتكىزدى.

«مەن مۇنداي جىلىجايدى بىرىنشە رەت كورىپ تۇرمىن. قازاقستاندا مۇنداي جىلىجاي جوق. بۇل تاڭعالارلىق جاعداي. الداعى ۋاقىتتا جىلىجاي اۋقىمىن كەڭەيتىپ، قازاقستاندى تولىق قامتۋدى جوسپارلاۋ كەرەك. استانادا جوق جىلىجاي ەكەن. ءبىر جىلىجاي وبلىستى تۇگەل قامتۋعا جەتەدى. كەرەمەت!»، - دەدى ءومىرزاق شوكەيەۆ.

ايتا كەتەيىك، مۇندا قىزاناقتىڭ ءۇش ءتۇرى وسىرىلەدى. ءونىمنىڭ 70 پايىزى ەكسپورتتالادى. ال 30 پايىزى ىشكى نارىققا باعىتتالعان. قۋاتتىلىعى جىلىنا - 6 مىڭ توننا. كاسىپكەرلەر شارشى مەترىنەن 80 كەلىگە دەيىن قىزاناق الادى. گوللانديادان كەلگەن جىلىجاي اگرونومى ەكى جىلدىق كەلىسىمشارتپەن جۇمىس ىستەپ جاتىر.

«قازىر رەسەيگە تاسىمالداپ جاتىرمىز. نارىق وتە ىڭعايلى. اۋىل شارۋاشىلىعى مينيسترلىگى، «قازاگروقارجى» ينستيتۋتىمەن بىرلەسكەن مەموراندۋم بار. ءبىز جىلىجاي اۋماعىن 100 گەكتارعا جەتكىزگىمىز كەلەدى. قازىر تاعى 40 گەكتار جەر الىندى. الداعى ۋاقىتتا 20 گەكتار جىلىجاي سالىنادى. بيىل ءبىر جىلىجايدىڭ قۇرىلىسى باستالادى»، - دەدى «گرينحاۋس قازاقستان» جىلىجايىنىڭ باس ديرەكتورى ءمۇسلىم بەكتەروۆ.

پرەمەر-ءمينيستردىڭ ورىنباسارى-اۋىل شارۋاشىلىعى ءمينيسترى كاسىپكەردى قولدايتىنىن، جوبانى جۇزەگە اسىرۋعا كىرىسۋ قاجەتتىگىن ايتتى.