اقتاۋدا ەر ادام ۇلىن ومىردەن ايىرعان كۇدىكتىنى ۇرىپ ءولتىردى

«وسى ءۇشىن اقتاۋ تۇرعىنى 19 جىلعا سوتتالدى»، - دەيدى ماڭعىستاۋ وبلىسى قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءتوراعاسى ازات ءىزباساروۆ.

ەر ادام ۇلىنىڭ ءولىمىن ماڭعىستاۋ تۇرعىنىنان كورگەن. ونى ۇرلاپ اكەتۋگە كومەكتەسۋ ءۇشىن تانىسىنا ءۇش مىڭ ا ق ش دوللارىن ۇسىنعان. تانىسى تاعى ءۇش ادام جالداعان. كۇدىكتى ۇيىنەن شىققان كەزدە ونىڭ قولىن بايلاپ، ماشيناعا وتىرعىزادى دا، يەن دالاعا الىپ كەتەدى. زوردىڭ كۇشىمەن كۇدىكتى ايىبىن مويىندايدى. بۇدان كەيىن قازا بولعان ۇلدىڭ اكەسى قۇقىق قورعاۋ ورگاندارىنا «كۇدىكتى ايىبىن مويىنداعانىن» حابارلاعان. ءبىراق كۇدىكتى بوستاندىقتا جۇرە بەرگەن.

كەيىن ولار كۇدىكتىنى ەكىنشى رەت ۇستاپ، «تەرگەيدى». الايدا بۇل جولى قىلمىسقا قاتىسى جوقتىعىن ايتادى. قارسىلاسقان كۇدىكتىنى ەر ادام ولگەنشە ساباپ، دەنەسىن ايدالاعا كومىپ كەتكەن.

ۇلدىڭ اكەسى ادام ولتىرگەنى ءۇشىن - 19 جىلعا، سىبايلاستارى 16 جىلعا باس بوستاندىقتارىنان ايىرىلدى. ۇكىم زاڭدى كۇشىنە ەندى.