رەسەيدە دروندار ساۋداسىنا تىيىم سالىنباق

بۇعان سيرياداعى رەسەيلىك اسكەري بازانىڭ دروندار شابۋىلىنا ۇشىراۋى دالەل. وسى وقيعادان بىرنەشە كۇن وتىسىمەن مەملەكەتتىك دۋما دەپۋتاتتارى رەسەيدە درونداردى ەركىن ساتۋعا تىيىم سالۋدى ۇسىندى. درونداردى تىركەۋ مەن باقىلاۋ مىندەتىن كۇشتىك قۇرىلىمدار قۇزىرىنا بەرۋ ۇيعارىلعان.

 ۆلاديمير بەلىي باسقاراتىن كومپانيا روبوتتاردى شىعارادى. جىل سايىن ارنايى تاپسىرىس بويىنشا 15 ءتۇرلى ۇلگىدەگى 150-گە جۋىق درون جاساپ ءجۇر. ءارقايسىسىنىڭ باعاسى ونداعان ميلليون رۋبلگە جەتەدى.

 ۆلاديمير بەلىي، Alpha Robotics Venture كومپانياسىنىڭ باسشىسى:

- ولار جۇزدەگەن شاقىرىم قاشىقتىققا ۇشىپ، ۇلكەن بوگەتتەردى اسىپ، جاۋدى باقىلاپ، جويۋعا دەيىن ءتۇرلى قىزمەت اتقارا الادى. سپۋتنيك ارقىلى باسقارىلادى.

 2017 -جىلى الەم بويىنشا 3 ميلليوننان اسا كوپتەر شىعارىلدى. لاڭكەستەر دە تەز ارادا جاڭا تەحنولوگيانى مەڭگەرىپ العان. سوعىس ءجۇرىپ جاتقان ايماقتاردا بارلاۋ مەن شابۋىلداۋ ءۇشىن پيلوتسىز ۇشاتىن قۇرىلعىلاردى قولدانىپ جۇرگەنىنە بىرنەشە جىل بولدى.

 ۆلاديمير بەلىي، Alpha Robotics Venture:

- دۇكەندە كادىمگى قىتايلىق ازاماتتىق دروندى ساتىپ الىپ، وعان گراناتا ىلسەڭىز، ول قاۋىپتى قارۋعا اينالادى. وسىنداي درونداردى ەشبىر سپۋتنيك بايقاي المايدى. اسكەري ساراپشىلاردىڭ پىكىرىنشە، ەندى قاسكويلەر لاڭكەستىك جاساۋ ءۇشىن درونداردى الەمنىڭ كەز كەلگەن جەرىندە قولدانا الادى.

 پيلوتسىز ۇشاتىن قۇرىلعىلارعا توتەپ بەرەتىن جۇيەلەر دە شىعارىلىپ ءجۇر. اكۋستيكالىق مىلتىقتار، لازەر زەڭبىرەكتەرى، راديوەلەكتروندى كۇرەس قۇرىلعىلارى، باسقارۋىن وزىنە تارتىپ جەرگە قوندىرۋ، ءتىپتى درونداردىڭ دروندارمەن شايقاسىن ەندى فانتاستيكادا عانا ەمەس، ءوز كوزىمەن كورۋگە بولادى. الايدا رەسەيدىڭ ءىرى قالالارى دروندار شابۋىلدارىنان قورعانا المايتىنىن اسكەريلەر دە مويىنداعان.

ەۆگەني بۋجينسكي، گەنەرال- لەيتەنانت، اسكەري ساراپشى:

 - اتوم ستانسالارى، اسكەري كەشەندەر سياقتى ينفراقۇرىلىمنىڭ ماڭىزدى نىساندارىن قورعاپ قالۋعا مۇمكىندىگىمىز بار. ال ماسەلەن، ستاديوندا ءبىر شارا نەمەسە كونسەرت ءوتىپ جاتسا، قايتەمىز؟ قالاي قورعاپ الامىز؟ ءتيىستى قۇرىلىمدار وسى ماسەلەنى ويلاستىرىپ، تەحنيكالىق شەشىمدەرىن تابۋى مۇمكىن دەپ سانايمىن.

دەنيس فەدۋتينوۆ، پيلوتسىز اۆياتسيا ساراپشىسى:

 - ماسكەۋ سياقتى ءىرى قالالاردىڭ بەيبىت تۇرعىندارىن قورعاۋ -  ۇزاق پروتسەسس. قازىرگى كەزدە ءتارتىپ باقىلايتىن قىزمەتتەر وسىنداي قاۋىپتەرگە توتەپ بەرە المايدى. سونداي- اق رەسەيدە جەكە مەنشىك كوپتەرلەردى تىركەۋ مەن باقىلاۋدىڭ ناقتى جۇيەسى ءالى قالىپتاسپاعان. ولاردى مىندەتتى تۇردە تىركەۋ قاجەت، ءبىراق ءىس جۇزىندە وسى شارتتى ورىنداتۋ قيىن. رەسەي اۆياتسياسى پيلوتسىز قۇرىلعىلاردىڭ تىركەۋىن جۇرگىزۋگە ازىرشە دايىن ەمەس، ءتيىستى ينفراقۇرىلىمى مەن ماماندارى جوق. مۇنىڭ ءبارى قاشان دايىن بولاتىنى بەلگىسىز. رەسەيدە عانا ەمەس، بۇكىل دۇنيەدە پيلوتسىز تەحنيكانى زاڭدى تۇردە قولدانۋعا جول اشاتىن زاڭناما جۇيەسىن قالىپتاستىرۋ ءجۇرىپ جاتىر.

وسىنداي جاعدايدا جەكەمەنشىك دروندارعا اۋە كەڭىستىگىن جابۋعا باعىتتالعان ساياساتشىلاردىڭ ارەكەتىن نەگىزدى دەپ ساناۋعا بولادى. حالىقتى جاڭا قاۋىپتەن ساقتاپ قالاتىن تەحنولوگيالار پايدا بولعانعا دەيىن ۋاقىت ۇتۋ قاجەت.

www.24.kz