جانبوتا الدابەرگەنوۆا: ارمانىم وليمپيادا مەدالى
تورتكۇل دۇنيە كوز تىگەتىن جاھاندىق جارىس باستالماس بۇرىن وسى وليمپيادادا فريستايلدىڭ اكروباتيكا تۇرىنەن ەل نامىسىن قورعايتىن جانبوتا الدابەرگەنوۆامەن سۇحباتتاسۋدىڭ ءساتى تۇسكەن ەدى. سپورتشى وسىدان بىرەر كۇن بۇرىن الماتىعا كەلىپ، قازاقستان قۇراماسىن وليمپياداعا ارنايى شىعارىپ سالۋ راسىمىنە قاتىسقان بولاتىن.
- جانبوتا ەركىن قىزى، وليمپياداعا ساناۋلى كۇندەر عانا قالدى. قانداي كوڭىل كۇيدەسىز؟
- كوڭىل كۇيىم وتە جاقسى. وليمپيادا جاقىنداعان سايىن تاعاتسىزدانا كۇتىپ ءجۇرمىن. 2017-جىلى اقپان ايى مەن ءۇشىن ءساتتى باستالعان ەدى. وزدەرىڭىز دە بىلەسىزدەر، بىلتىرعى جىلى وسى ۋاقىتتا اسەم قالامىز الماتىدا وتەتىن دۇنيەجۇزىلىك ۋنيۆەرسيادا ويىندارىنا قىزۋ دايىندىق ءجۇرىپ جاتقان ەدى. مىنە، بيىل وليمپيادا ويىندارىنا قىزۋ دايىندالىپ جاتىرمىز. ۋنيۆەرسيادا جەكەلەي سىندا ءبىر قولا مەدالعا قول جەتكىزسەم، اراعا ءبىر كۇن سالىپ، كوماندامىزبەن بىرگە التىن جۇلدەنى ۇتىپ الدىق. دۇنيەجۇزىلىك ۋنيۆەرسيادا ويىندارى دا تۋرا اقپان ايىنىڭ باسىندا باستالدى. مىنە، وليمپيادا ويىندارى دا تۋرا سول ۋاقىتتا وتكەلى وتىر. وتكەن جىلى اقپان ايى قالاي جەمىستى بولسا، بيىلعى اقپان ايى دا سونداي جەمىستى بولسا ەكەن دەپ تىلەپ ءجۇرمىن.
- دەمەك، بيىل دا اقپان ايىندا سول جەتىستىكتەردى قايتالاسام دەيسىز عوي...
- ارينە، سولاي بولىپ جاتسا، ەل سەنىمى اقتالاتىن، اقتۇيەنىڭ قارىنى جارىلاتىن قۇتتى اي بولار ەدى. سەبەبى، باستى ماقساتىم، ياعني ارمانىم - وليميادا مەدالى. وليمپيادا ايى سپورتشىلارىمىزعا ساتتىلىك اكەلسىن دەپ تىلەي بەرىڭىزدەر.
- وسى وليمپياداعا جولداما الۋدىڭ ءوزى ۇلكەن ەڭبەكتى قاجەت ەتەدى. ءسىز قانداي بيىكتەردى باعىندىرىپ، باستى دوداعا قاتىسۋعا مۇمكىندىك الدىڭىز؟
- ءبىز ءبىر عانا الەم چەمپيوناتىنا نەمەسە الەم كۋبوگىنا عانا قاتىسىپ، جولداماعا قول جەتكىزە المايمىز. وسى مارتەبەگە جەتۋ ءۇشىن ءبىر جىل بويى الەم كۋبوگىنا قاتىسىپ، بارلىق كەزەڭدەردەگى ناتيجەمىزدىڭ جالپى قورىتىندىسى بويىنشا ىرىكتەلەمىز. سوندىقتان ءار كەزەڭ ءبىز ءۇشىن ماڭىزدى.
- ول الەم كۋبوگى قانشا كەزەڭنەن تۇرادى؟ ءسىز نەشەۋىنە قاتىستىڭىز؟
- جالپى، التى كەزەڭنەن تۇرادى. مەن سونىڭ بەس كەزەڭىنە قاتىسىپ، وليمپياداعا جولداما الدىم.
- قازىر قايدا جاتتىعىپ جاتىرسىز؟ دايىندىعىڭىز قالاي؟
- دايىندىعىم وتە جاقسى. ءبىز ءۇشىن الەم كۋبوگىنىڭ ءار كەزەڭى ۇلكەن جاتتىعۋ. سوندىقتان كوبىندە ءار ەلدە، ءار ءتۇرلى تاۋ بەتكەيلەرىندە جاتتىعامىز. قازىر سوڭعى دايىندىعىمدى رەسەيدە وتكىزىپ جاتىرمىن. بۇل جولى الماتىعا بىرەر كۇنگە وليمپياداعا ارنالعان كيىم-كەشەگىمدى الىپ كەتۋگە كەلگەن بولاتىنمىن. سوڭعى جاتتىعۋىمدى رەسەيدە جالعاستىرىپ، اقپاننىڭ باسىندا وليمپياداعا جول تارتامىن.
- وليمپيادادا قاي ەلدىڭ سپورتشىلارىن باستى قارسىلاس دەپ سانايسىز؟
- قانشا ەلدەن سپورتشى كەلەدى، سونىڭ بارلىعى بىزگە قارسىلاس. سونىڭ ىشىندە قىتاي، رەسەي، بەلارۋس جانە جارىس قوجايىندارى وسى وليمپياداداعى ەڭ باستى قارسىلاستار دەپ ايتۋعا بولادى.
- بۇل ءسىزدىڭ ءبىرىنشى وليمپياداڭىز ەمەس. سوچيدە 6- ورىنعا قول جەتكىزگەنىڭىزدى جاقسى بىلەمىز. ەكىنشى رەت قاتىسقالى وتىرعان باستى دودادا جەڭىس تۇعىرىنا كوتەرىلۋگە مۇمكىندىگىڭىزدى باعالاپ كوردىڭىز بە؟
- بارلىعى ءبىر اللانىڭ قولىندا. باعىم مەن بابىم قاتار شاۋىپ جاتسا، نەگە مەدال الماسقا؟! بار سپورتشىنىڭ ارمانى وليمپيادادا مەدال الۋ. سول باقىتتىڭ ءدامىن تاتۋ مەنىڭ دە ارمانىم. بيىل بار كۇشىمدى جيناپ، بيىكتەن كورىنۋگە تىرىسام.
- ەندى، كەرى شەگىنىپ، قارى جۇقا تۇسەتىن وڭتۇستىك وڭىرىنەن وسى سپورت تۇرىنە قالاي كەلگەنىڭىزدى ەسىڭىزگە تۇسىرە كەتسەڭىز؟
- مەنىڭ بۇل سپورتقا كەلۋىمە 2011-جىلى الماتى مەن استانادا وتكەن قىسقى ازيادا ويىندارى باستى سەبەپ بولدى. سول بايراقتى باسەكەدە سپورتتىڭ وسى ءتۇرىن تەلەارنادان كورىپ، قاتتى قىزىقتىم. كەيىن ۋاقىت جوعالتپاي وسى سپورت تۇرىنە بارىپ باق سىناپ كورۋدى ءجون سانادىم. قىزىعۋشىلىعىممەن تاباندىلىعىمنىڭ ارقاسىندا مەڭگەرىپ الىپ، ارى قاراي جالعاستىرىپ كەتتىم. سونىڭ ناتيجەسى مىنە، ەكىنشى وليمپياداما اتتانعالى وتىرمىن. كوپتەگەن دودالاردا جۇلدەلى بولدىم.
- بۇل سپورت ءسىزدى نەسىمەن قىزىقتىردى؟ قازاقتىڭ قاراپايىم نازىك قىزدارىنا اسپاندا قالىقتاپ، شىر كوبەلەك اينالىپ سەكىرۋ قورقىنىشتى بولعان جوق پا؟
- ءار سپورتتىڭ ءوزىندىڭ قيىندىعى بار. بار ىنتا-جىگەرىڭمەن بەرىلە كىرىسكەن ىستەن ناتيجە بولادى ەكەن. ەڭ باستىسى - جۇرەكتىلىك، باتىلدىق، تاباندىلىق كەرەك.
- فريستايلعا دەيىن نەمەن اينالىستىڭىز؟
- سپورتتىق گيمناستيكامەن اينالىستىم. كەيىن بۇل سپورت تۇرىنەن ماقساتىما جەتە المايتىنىمدى انىق بايقادىم. سوسىن فريستايلدى تاڭدادىم.
- سپورتتىق گيمناستيكادان قانداي جەتىستىكتەرگە قول جەتكىزدىڭىز؟
- سپورت شەبەرى اتاعىنا يە بولدىم.
- اڭگىمەڭىزگە راحمەت! وليميادادا جۇلدەلى بولۋىڭىزعا تىلەكتەسپىز.
اۆتور: كۇنسۇلتان وتارباي
