قازاق بوكسشى چەمپيوندىق بەلبەۋ ءۇشىن امەريكاعا اتتاندى

استانا. قازاقپارات - بۇگىن تۇندە قازاقستاندىق كاسىپقوي بوكسشى ايدار شارىبايەۆ وقۋ-جاتتىعۋ جيىنىن وتكىزۋ ءۇشىن ماياميگە اتتاندى، دەپ حابارلايدى قازاقپارات.

جيىن قورىتىندىسى بويىنشا ول ا ق ش- تا چەمپيوندىق جەكپە-جەگىن وتكىزەدى.

قازاقستاندىق بوكسشىنىڭ چەمپيوندىق ءۇشىن ايقاسى ناۋرىز ايىنا جوسپارلانعان. ازىرگە ونىڭ قارسىلاسى بەلگىسىز. دەگەنمەن، جەڭىل سالماق دارەجەسىندە WBA Inter- Continental بەلبەۋىنە تالاسادى دەپ كۇتىلۋدە. ال ماياميدە شارىبايەۆ ءوزىنىڭ جەكە باپكەرى وسميري فەرناندەستىڭ قاراماعىندا جاتتىعادى.

الماتى اۋەجايى ارقىلى ۇشقان ايداردى دوستارى مەن جاقىن تۋىستارى شىعارىپ سالىپ، الداعى جەكپە-جەگىنە جەڭىس تىلەدى.

«2018-جىلدان ۇلكەن ءۇمىت كۇتەمىن. ءتورت ايقاس وتكىزسەم دەيمىن. قازىر پروموۋتەرلەرىم اينالىسىپ جاتىر. سول تورتەۋدىڭ ەكەۋى چەمپيوندىق جەكپە-جەكتەر بولۋى ءتيىس. وسى ورايدا WBA Inter- Continental بەلبەۋى كاسىپقوي بوكستاعى كارەراما ۇلكەن سەرپىن بەرىپ، جاڭا باعىتتار اشادى دەپ ويلايمىن. بۇيىرتسا، وسى جولى ەلگە قالايدا چەمپيوندىق اتاقپەن ورالۋعا تىرىسامىن»، - دەدى Diamond Ring تىلشىسىنە سۇحبات بەرگەن ايدار شارىبايەۆ.

ەستەرىڭىزگە سالا كەتەيىك، سوڭعى ايقاسىن وتكەن جىلدىڭ قاراشاسىندا كولۋمبيالىق داۋليس پرەسكوتقا قارسى وتكىزگەن جەرلەسىمىز قارسىلاسىن ءبىرىنشى راۋندتا-اق نوكاۋتقا تۇسىرگەن. وسىلايشا، ايدار شارىبايەۆتىڭ ەنشىسىندە جەتى جەكپە-جەك بار. بارلىعىندا جەڭىسكە جەتىپ، التاۋىندا قارسىلاسىن نوكاۋتپەن ۇتقان.

اۆتور: كۇنسۇلتان وتارباي