ءاربىر اتا-انا ءدىني ساۋاتتىلىعىن ارتتىرۋى قاجەت - باس مۋفتي
جيىنعا قاتىسقان ءدىني باسقارمانىڭ ءتوراعاسى سەرىكباي قاجى وراز ءاربىر اتا-انانىڭ ءدىني ساۋاتتىلىعىن ارتتىرۋى قاجەتتىگىن اتاپ ءوتتى، دەپ حابارلايدى قازاقپارات ءتىلشىسى.
باس ءمۇفتي بايانداماسىندا قازاق تاريحىنىڭ قاتپارلارىنا كوز جۇگىرتىپ، حانافي ءمازحابىنىڭ ماڭىزىن ايشىقتادى. وسىدان 12 عاسىر بۇرىن تۇركىلىك تانىم مەن ۇلتتىق تاريحقا مۇسىلماندىق جولدىڭ ىقپال ەتۋى رۋحاني سىلكىنىس تۋدىرعانىن ءسوز ەتتى. سونداي-اق، سەرىكباي قاجى وراز جۇرتشىلىقتى ءدۇدامال ءدىني اعىمداردان ساقتاۋ ءۇشىن ءدىني ساۋاتتىلىعىن ارتتىرۋعا شاقىردى. ويتكەنى قوعام مەن ءدىننىڭ ارا-قاتىناسىن بەلگىلەپ الۋ ءۇشىن اتا-انالار ايانىپ قالماۋى قاجەت. جاستاردى جات اعىمنىڭ جەتەگىنە جىبەرمەي، اتا ءدىننىڭ ارتىقشىلىقتارىن ايتىپ وتىرعان دۇرىس دەگەن باس مۋفتي ەلباسى ماقالاسى دا وسى ماقساتتى كوزدەيتىنىن جەتكىزدى.
جيىندا باس قوسقان زيالى قاۋىم وكىلدەرى قازىرگى كەزەڭدەگى يماني-الەۋمەتتىك جۇتاڭدىقتى بولدىرماۋدىڭ پارمەندى ءتۇرى - ءدىن ەكەنىن ەكشەدى. ونىڭ عاسىرلار بويى قالىپتاسقان مورالدىق بايلىقتارىنىڭ قادىر- قاسيەتىنىڭ ءمانى كۇن وتكەن سايىن ءوسىپ وتىرعانىن ايتتى. قوعامداعى يسلام ءدىنى تۋرالى كوزقاراستىڭ وڭ باعىتتا وزگەرۋىنە تەولوگ مامانداردىڭ ۇلەسى كوپ ەكەنىن اتاپ ءوتتى.
كونفەرەنسياعا قاتىسۋشىلار كەڭەستىك يدەولوگيانىڭ شەكتەۋ شەڭبەرىنەن شىعىپ، ءدىني سەنىمدەرگە كەڭ جول اشىلعان دەموكراتيالىق كەزەڭدە حالىققا دۇرىس ۋاعىز ايتۋ - اسا ماڭىزدى دەگەن وي ءبىلدىردى.
اۆتور: اينۇر اقبايەۆا
