وبلىس اكىمى جانسەيىت تۇيمەبايەۆ اۋدان اكىمىنىڭ ەسەبىنە كۇتپەگەن جەردەن كىرىپ كەلدى
جيىنعا وبلىس اكىمى جانسەيىت تۇيمەبايەۆ كۇتپەگەن جەردەن كىرىپ كەلىپ، جۇرتتى تاڭعالدىردى. ايماق باسشىسىنىڭ كەلگەنىنە ريزا بولعان تۇرعىندار وزدەرىن تولعاندىرعان ماسەلەلەرىن جەتكىزدى، دەپ حابارلايدى قازاقپارات ءتىلشىسى.
قالا اكىمى نۇرلان ساۋرانبايەۆ پەن جەرگىلىكتى تۇرعىندار، ارداگەرلەر مەن ءماسليحات دەپۋتاتتارى قاتىسقان جيىندا عالىمجان ءىلياسوۆ 2017 - جىلعى اتقارىلعان نەگىزگى باسىمدىقتارعا توقتالىپ، الداعى ۋاقىتتا جۇزەگە اسىرىلاتىن جۇمىستار بارىسىن بايان ەتتى. ەسەپتىك جيىندا تۇرعىنداردىڭ باسىم بولىگى كوپقاباتتى ۇيلەردىڭ اۋلاسىن جارىقتاندىرۋ مەن ويىن الاڭشالارىن سالۋ جانە كارىز جۇيەسى مەن جول، جەر تەلىمى ماسەلەسىن كوتەردى. حالىقتىڭ ساۋالدارى مەن ۇسىنىستارىن مۇقيات تىڭداعان وبلىس اكىمى كوتەرىلىپ جاتقان ماسەلەر كەزەڭ- كەزەڭىمەن شەشىمىن تاباتىنىن ايتىپ، قالاداعى كوممۋنالدىق ماسەلەلەردى رەتكە كەلتىرۋ ءۇشىن وبلىستىق بيۋدجەتتەن بولىنەتىن قارجى جىل سايىن ارتىپ كەلەتىنىن جەتكىزدى.
«وسىندا كوتەرىلگەن پروبلەمانىڭ بارلىعى نازارعا الىنىپ، ءتيىستى جۇمىستار اتقارىلاتىن بولادى. وزدەرىڭىزگە ءمالىم، بۇگىندە قالا اۋماعىنا 70 مىڭ گەكتار جەر قوسىلىپ، استانا مەن الماتى قالالارى سەكىلدى كولەمى ۇلعايىپ وتىر. قالا اۋماعى ۇلعايعان سايىن كوممۋنالدىق ماسەلەلەردىڭ ارتاتىنى دا بەلگىلى. ال بارلىق ماسەلە بىردەن شەشىلە قويمايدى، ونى بىلەسىزدەر. شاھار اۋماعىن كورىكتەندىرىپ، تۇرعىن ءۇي- كوممۋنالدى شارۋاشىلىق سالاسىنىڭ جۇمىستارى جوسپار بويىنشا ىستەلىنىپ جاتىر. الداعى ۋاقىتتا قالا اۋماعىندا 64 كوشە ورتاشا جوندەۋدەن وتەتىن بولسا، 36 كوشە كۇردەلى جوندەلەدى. ال ونعا جۋىق كوشەگە جاياۋ جۇرگىنشىلەر جولى سالىنادى»، - دەدى ايماق باسشىسى.
بۇدان بولەك، جانسەيىت تۇيمەبايەۆ اۋدان اكىمىنە تۇرعىنداردان كەلىپ تۇسكەن ساۋالداردىڭ كۇردەلىلىگىنە بايلانىستى جىكتەپ، ءۇش كۇندىك، 1- 2 اپتالىق جانە ءبىر ايلىق مەرزىمدەرمەن ورىندالۋى تۋرالى كەستە ازىرلەۋدى تاپسىردى. مۇنى ءبىر ەڭبەكشى اۋدانىنا عانا ەمەس، قالاداعى وزگە دە اۋدان اكىمدەرىنە جۇكتەپ، ولاردىڭ ورىندالۋىن وبلىس اكىمى اپپاراتىنىڭ ينسپەكتورلارى باقىلايتىنىن اتاپ ءوتتى.
اۆتور: اينۇر اقبايەۆا
