نىعماتۋلين قازاقشا بايانداما جاساعان دەپۋتاتتى شەنەۋنىكتەرگە ۇلگى ەتتى

استانا. قازاقپارات -  بۇگىن ماجىلىستە دەپۋتات نارينە ميكاەليان «قازاقستان رەسپۋبليكاسى مەن ۆەتنام سوتسياليستىك رەسپۋبليكاسى اراسىنداعى ۇستاپ بەرۋ تۋرالى شارتتى راتيفيكاتسيالاۋ تۋرالى» زاڭ جوباسى بويىنشا قوسىمشا بايانداماسىن باستان- اياق قازاقشا جاساپ شىقتى.

ميكاەليان بايانداماسىن جاساپ بولعان سوڭ ءماجىلىس ءتوراعاسى نۇرلان نىعماتۋلين:

«راحمەت. جارايسىڭ، نارينە گاملەتوۆنا!»، - دەدى. ءتوراعانىڭ بۇل سوزىنە دەپۋتاتتار قول سوعىپ، قولداۋ كورسەتتى.

 «مەنىڭشە، كوپتەگەن ازاماتتارعا جاقسى ۇلگى كورسەتتى. اسىرەسە، سول جاقتا وتىرعاندارعا»، - دەدى نىعماتۋلين.

 ال سول جاقتا زاڭ جوباسى بويىنشا دەپۋتاتتاردىڭ الدىندا بايانداما جاساپ، ولاردىڭ سۇراقتارىنا جاۋاپ بەرەتىن مەملەكەتتىك ورگانداردىڭ وكىلدەرى وتىرادى. بۇگىنگى وتىرىستا ارحيۆ ءىسى ماسەلەلەرى تۋرالى زاڭ جوباسى بويىنشا مادەنيەت جانە سپورت ءمينيسترى ارىستانبەك مۇحامەدي ۇلى بايانداماسىن تولىق دەرلىك ورىس تىلىندە جاسادى. بۇدان بولەك ءبىرقاتار مينيسترلىكتىڭ لاۋازىمدى تۇلعالارى قازاقشا قويىلعان سۇراقتارعا رەسمي تىلدە جاۋاپ بەردى.

 نارينە ميكاەليان قازاقشا بايانداعان زاڭ جوباسىن دەپۋتاتتار ماقۇلدادى. دەپۋتاتتىڭ ايتۋىنشا، اتالعان زاڭ جوباسى قازاقستاننىڭ حالىقارالىق شارتتارى تۋرالى زاڭىنا سايكەس ازىرلەندى.

sputniknews.kz