مەملەكەتتىك- اقپاراتتىق تاپسىرىستان باس تارتۋعا بولمايدى - داۋرەن ابايەۆ

استانا. قازاقپارات - ق ر اقپارات جانە كوممۋنيكاتسيالار ءمينيسترى داۋرەن ابايەۆ مەملەكەتتىك- اقپاراتتىق تاپسىرىستىڭ تيىمدىلىگىن ءتۇسىندىرىپ بەردى، دەپ حابارلايدى قازاقپارات ءتىلشىسى.

«بۇگىندە مەملەكەتتىك- اقپاراتتىق تاپسىرىستى سىنايتىندار از ەمەس. اتالعان تاجىريبەدەن باس تارتۋ قاجەت دەيدى. ءدال قازىر ولاي ىستەۋگە بولمايدى. مەملەكەتتىك سۋبسيديالاۋدان تولىعىمەن باس تارتساق، قازاقستاندىق مەديا كەڭىستىكتىڭ دامۋىن تەجەيمىز. نەگە؟ سەبەبى مەملەكەتتىك- اقپاراتتىق تاپسىرىس اياسىندا جاڭا جوبالارعا قولداۋ جاسالادى، وتاندىق پروداكشن- يندۋسترياسىنا قارجى قۇيىلادى. سونىڭ ارقاسىندا مەديا نارىق دامىپ جاتىر»، - دەدى د. ابايەۆ بۇگىن «قازمەديا» ورتالىعىندا.

ءمينيستردىڭ ايتۋىنشا، مەملەكەتتىك سۋبسيديالاۋ ارقىلى شەتەلدىك كونتەنتتىڭ ۇلەسىن ازايتۋعا مۇمكىندىك بار.

«مەن بىلەمىن، كەيبىرەۋلەر مەملەكەتتىك- اقپاراتتىق تاپسىرىستى توقتاتۋ قاجەت دەپ سانايدى. ولاي ىستەسەك، شەتەلدىك كونتەنتتىڭ ۇلەسى ارتادى. قازىر بارلىق دەرلىك رەسپۋبليكالىق ارنالاردا وزگە ەلدىڭ ونىمدەرىن ساتىپ الۋ كولەمى قىسقارىپ جاتىر. سونىڭ ورنىنا ءوزىمىزدىڭ سەريالدارىمىز، دەرەكتى فيلمدەرىمىز بەن توك- شوۋلارىمىز كەلدى. ۇشىنشىدەن، جەكەمەنشىك ارنالارعا بولىنگەن مەملەكەتتىك تاپسىرىس قارجىسىن قازاق ءتىلدى باعدارلامالاردىڭ سانىن ارتتىرۋعا باعىتتالادى. مەملەكەتتىك ءتىلدى ءبىز وسى ارقىلى دا قولدايمىز. تورتىنشىدەن، مەملەكەتتىك سۋبسيديالاۋ «بالاپان»، «قازسپورت» پەن «ەلارنا» سياقتى كوممەرتسيالىق جاعىنان ءتيىمسىز جوبالاردى جۇرگىزۋگە مۇمكىندىك بەرىپ وتىر. بەسىنشىدەن، مەملەكەتتىك- اقپاراتتىق تاپسىرىس اياسىندا ءبىز سيفرلىق تەحنولوگيالاردى دامىتىپ، تەلەارنالاردى حالىققا تەگىن تاراتىپ جاتىرمىز»، - دەپ اتاپ كورسەتتى د. ابايەۆ.

ايتا كەتەيىك، وتكەن جىلى مەملەكەتتىك اقپاراتتىق تاپسىرىس اياسىندا 40 تەلەسەريال تۇسىرىلگەن بولاتىن. اتالعان كورسەتكىش ءبىر جىل بۇرىن بولعان مەجەدەن ەكى ەسەگە ارتىق.

اۆتور: ارمان اسقاروۆ