داۋرەن ابايەۆ وتاندىق سەريالدار تۋرالى: ءبىز كورەرمەننىڭ پىكىرىن بىلەمىز
ءمينيستردىڭ ايتۋىنشا، بۇگىندە وتاندىق سەريالداردى دامىتۋ جۇمىسىنا نەگىزگى باسىمدىق بەرىلىپ وتىر. بۇل - مەملەكەت باسشىسىنىڭ تىكەلەي تاپسىرماسى.
«ءبىز حالقىمىزدىڭ سالت- ءداستۇرىن، تاريحى مەن ەرەكشە قۇندىلىقتارىن ناسيحاتتايتىن تەلەونىمدەرگە باسا نازار اۋدارىپ وتىرمىز. ماسەلەن، وتكەن جىلى ءارتۇرلى جانر مەن تاقىرىپتا 40 سەريال كورەرمەنگە ۇسىنىلدى. وتاندىق تەلەحيكايالاردى تەك مەملەكەتتىك ارنالارعا ەمەس، كوممەرتسيالىق تەلەارنالارعا دا تاپسىرعان بولاتىنبىز. ول سەريالدار ارقىلى قوعامنىڭ الەۋمەتتىك تۇستارى - وتباسىلىق قۇندىلىقتار، بەرەكە مەن بىرلىكتى ناسيحاتتاپ، حالقىمىزدىڭ باي تاريحى مەن ءداستۇرىن كورسەتۋگە تىرىستىق»، - دەدى د. ابايەۆ «قازمەديا» ورتالىعىندا وتكەن كەزدەسۋدە.
داۋرەن اسكەربەك ۇلى سەريالداردىڭ رەيتينگى بىردەن كوتەرىلمەيتىنىن جەتكىزدى. سەبەبى كورەرمەن قاۋىمنىڭ تالعامى ءارالۋان.
«ەڭ باستىسى، وسى جۇمىستار شىعارماشىلىق توپتاردىڭ كاسىبي دەڭگەيىن وسىرۋگە ىقپال ەتەدى دەپ سەنەمىز. ءبىز قۇرمەتتى كورەرمەندەرىمىز بەن زيالى قاۋىمنىڭ پىكىرىن دە ءبىلىپ وتىرمىز.
«ەكراندى شەتەلدىك سەريالدار جاۋلاپ الدى» دەپ جاتقاندار دا بار. سوندىقتان ءبىز الدىمىزعا اۋقىمدى ستراتەگيالىق ماقسات قويدىق. ول ماقساتىمىز - ساپالى وتاندىق تەلەفيلمدەردىڭ سانىن ارتتىرۋ، كورەرمەن تالعامىنا ساي جاقسى سەريالداردى ءتۇسىرۋ»، - دەپ اتاپ كورسەتتى د. ابايەۆ.
اۆتور: ارمان اسقاروۆ
