فرانسيادا العاش رەت ادامنىڭ بەتىن قايتادان اۋىستىرۋ وپەراتسياسى جاسالدى

استانا. قازاقپارات - فرانسيادا حيرۋرگتەر ءبىرىنشى رەت ادامنىڭ بەتىن قايتادان اۋىستىرۋ وپەراتسياسىن جاسادى.

جەتى جىلدان كەيىن بەت اۋىستىرۋ وپەراتسياسى جاسالعان ەمدەلۋشىنىڭ تەرىسى دونورلىق تىندەردى قابىلداماي قويعاندىقتان، دارىگەرلەر وعان قايتادان ترانسپلانتاتسيا جاساۋ تۋرالى شەشىم قابىلداعان. قايتادان وپەراتسيا جاسار الدىندا ەر ادام شامامەن ءبىر جارىم اي بويى كومادا جاتقان.

ەڭ العاش رەت بەت تىندەرىن اۋىستىرۋ وتاسى 2005-جىلى ءيت تالاپ تاستاعان فرانسيالىق يزابەل دينۋارعا جاسالعان بولاتىن. ول وپەراتسيادان كەيىن 10 جىلدان استام ۋاقىت ءومىر ءسۇرىپ، 2016-جىلى ونكولوگيالىق اۋرۋدان قايتىس بولدى.

ال، العاش رەت بەت تىندەرىن قايتادان اۋىستىرۋ وپەراتسياسى 40 جاستاعى فرانسۋزدىققا جاسالعان. 2017-جىلعى 30- قاراشادا دارىگەرلەر ونىڭ ورگانيزمى دونورلىق تىندەردى قابىلداماي قويعانىنا بايلانىستى ەمدەلۋشىنى جاساندى كوماعا ءتۇسىردى. ەندى وپەراتسيا 2018-جىلعى قاڭتاردىڭ ورتاسىندا جاسالىپ وتىر. وتا جاساۋ ۋاقىتى كۇنى بويى جالعاسقان.

ەندى وتانىڭ قالاي وتكەنى تۋرالى دارىگەرلەر تەك بىرنەشە اپتا وتكەننەن كەيىن عانا ايتا الادى.

مامانداردىڭ ايتۋىنشا، ادامنىڭ بەت ءتىنىن اۋىستىرۋ ەڭ قيىن پروتسەدۋرالاردىڭ ءبىرى كورىنەدى. 2005-جىلدان بەرى الەمدە وسىنداي 40 قا جۋىق وپەراتسيا جاسالعان. وسىنداي پروتسەدۋرالاردان وتكەن 6 ەمدەلۋشى كوز جۇمعان. ولاردىڭ يممۋندىق جۇيەسى ءالسىز بولعان. ال اۋىستىرىلعان تىندەردىڭ اجىراماۋى ءۇشىن ەمدەلۋشى ءومىر بويى يممۋنيتەتىن كوتەرەتىن پرەپاراتتار قابىلداپ وتىرۋى ءتيىس ەكەن. دارىگەرلەر پرەپاراتتار ورگانيزمنىڭ ينفەكتسيالار مەن ونكولوگيالىق اۋرۋلارعا قارسى تۇرۋىنا سەپتىگىن تيگىزەتىنىن ايتادى.

ساراپشىلاردىڭ پىكىرىنشە، وسىنداي پرەپاراتتاردىڭ ءبىرى يزابەل دينۋاردىڭ اۋرۋىنىڭ سەبەبى بولۋى مۇمكىن.