حالىقارالىق اۋىر اتلەتيكا فەدەراتسياسى يليا يليندى سپورتتان شەتتەتۋ مەرزىمىن وزگەرتتى
بۇل تۋرالى قازاقپارات IWF سايتىنا سىلتەمە جاساپ حابارلايدى.
يليا يليننىڭ سىناماسىنان دوپينگ تابىلىپ، 2008 جانە 2012-جىلدارى وتكەن وليمپيادا ويىندارىنىڭ التىن جۇلدەلەرىنەن ايىرىلعان ەدى. IWF حابارلاۋىنا قاراعاندا، قازاقستاندىق سپورتشىنى ديسكۆاليفيكاتسيالاۋ مەرزىمى 2018-جىلدىڭ 19- قازانىندا اياقتالادى.
بۇعان دەيىن سپورتتان شەتتەتۋ مەرزىمى 2016-جىلدىڭ 10- ماۋسىمىندا باستالعاندىعى تۋرالى حابارلاعان بولاتىنبىز.
سونداي-اق، قازاقپارات ءتىلشىسى يليا يلين 2020-جىلعى وليمپياداعا قاتىسۋى مۇمكىن ەكەندىگى تۋرالى دا جازعان ەدى.
ەسكە سالا كەتسەك، حالىقارالىق وليمپيادا كوميتەتى قازاقستاندىق اۋىر اتلەت يليا يليننىڭ بەيجىڭدەگى جانە لوندونداعى التىن مەدالدارىن ايىرۋ تۋرالى شەشىم شىعارعان بولاتىن. ح و ك- تىڭ ءتارتىپ كوميسسياسىنىڭ شەشىمىنە سايكەس «ا» جانە «ۆ» دوپينگ سىناماسىنىڭ قورىتىندىسى بويىنشا ەكى جازعى وليمپيادا ويىندارىندا چەمپيون اتانعان قازاقستاندىق سپورتشى يليا يليننىڭ بۇعان دەيىنگى كورسەتكىشتەرى جويىلعان.
