قىس قاھارى استانالىقتاردىڭ اۋىزبىرلىگىن ارتتىردى - فوتو

استانا. قازاقپارات- بيىل استانانىڭ قىسى ەرەكشە مىنەز كورسەتىپ، قاتتى اياز كۇشىنە ءمىندى. وسىعان وراي ءبىز، استانالىقتاردىڭ ايازدى كۇندەردى قالاي وتكەرىپ جاتقاندىعى تۋرالى فوترەپورتاج دايىندادىق.

تەرمومەتر باعانى -42 ءنى كورسەتىپ تۇر. استانالىقتار تۇمشالانىپ العان، ايازدان امان قالۋدىڭ جولىن اركىم ءارتۇرلى شەشىپ جاتقان سياقتى.

ماماندار بۇل ايازدىڭ قازاقستان اۋماعىمەن جىلجىپ بارا جاتقان اركتيكا انتيتسيكلونىنىڭ اسەرىنەن ەكەندىگىن ايتادى. وسىعان بايلانىستى بىرنەشە اۋداندا قولايسىز اۋا رايى تۋرالى ەسكەرتۋ جاريالاندى.

استانا تۇرعىندارى ايالدامالاردا ۇزاق تۇرا الماي، قوعامدىق كولىكتەرگە جىلدام ءمىنىپ كەتۋگە تىرىسۋدا. كوشەدەگى كولىك اتاۋلىنىڭ بارلىعىنان بۋ بۇرقىراپ، جولدار سۋىق بۋعا ورانىپ العانداي.

كوممۋنالدىق قىزمەت وكىلدەرى ۇلكەن سىناقتان ءوتىپ جاتقان بولۋى كەرەك. قالانىڭ تىرشىلىگىن توقتاتپاۋ مىندەتى قازىر سولاردىڭ موينىندا.

جەرگىلىكتى بيلىك كەز كەلگەن مەكەمەلەردىڭ، كاسىپورىندار مەن ساۋدا ورىندارىنىڭ باسشىلارىنا جۇمىس كۇنىن قىسقارتىپ، ادامداردى جۇمىستا ۇزاق ۇستاماۋعا شاقىردى.

«استانا جاستارى» ورتالىعىنىڭ ەرىكتىلەرى قالا تۇرعىندارى مەن قوناقتارىنا ايالدامالاردا تەگىن ىستىق شاي مەن كوفە ۇسىندى. قالاداعى ءدارىحانالاردىڭ بىرىندەگى ەسىكتە جىلىنىپ شاي ءىشىپ الۋعا شاقىرعان حابارلاما قاعاز ىلىنگەن.

قاقاعان قىستىڭ قاتتى ايازى استانالىقتاردى شىنىمەن دە بىرىكتىردى. الەۋمەتتىك جەلىلەردە تەگىن جەتكىزىپ تاستايتىنىن ايتىپ حابارلاما جازعان كولىگى بار ادامداردىڭ سانى ارتىپ كەلەدى.

كازگيدرومەت مالىمەتىنشە، استانادا 23-26- قاڭتار ارالىعىندا كۇندىز -32، تۇندە -40 گرادۋسقا دەيىن جەتەتىن قاتتى ايازدار بولادى.