دارىگەرلەر دەنساۋلىق ساقتاۋ مينيسترلىگىنە توموگرافيا اپپاراتىن ساتىپ الۋعا كەڭەس بەردى

استانا. قازاقپارات - رەسپۋبليكالىق دياگنوستيكالىق ورتالىق يادرولىق مەديتسينا ءبولىمىنىڭ ينجەنەر- فيزيگى سەرىك نۇركەنوۆ قازاقستانداعى العاشقى بىرەگەي تسيكلوترون تۋرالى ايتىپ بەردى،

دەپ حابارلايدى قازاقپارات ءتىلشىسى.

قازاقستاندا 2,7 ميلليارد تەڭگەگە گەپاتيتكە قارسى 6 پرەپارات ساتىپ الىنادى قازاقستان جاسوسپىرىمدەر سۋيتسيدىنىڭ الدىن الۋدا وڭ ناتيجەلەرگە قول جەتكىزدى

ماماننىڭ سوزىنشە، سيكلوترون شىعارعان راديواكتيۆتى كاپسۋلالاردى پاتسيەنتكە بەرۋ ارقىلى اعزاداعى ونكولوگيالىق اۋرۋلاردىڭ وشاعىن تابۋعا بولادى.

«وسىلايشا، ونكولوگيالىق اۋرۋلاردىڭ ءبىرىنشى جانە ەكىنشى كەزەڭىندەگى دياگنوستيكا ساپاسى 40-70 پايىزعا كوتەرىلەدى. ناتيجەسىندە ءولىم- ءجىتىم مەن اۋرۋدىڭ قايتالانۋ كورسەتكىشى ازايادى. بۇگىندە رەسپۋبليكا اۋماعىندا ەكى پەت- اپپارات (پوزيتروندى- ەميسسيالىق توموگرافيا) قانا بار. بۇل 18 ميلليون حالىقتىڭ قاجەتتىلىگىن وتەمەيدى. بارشامىزعا بەلگىلى، ونكولوگيادا ۋاقىت جوعارى باعالانادى. ۇلكەن كەزەكتى نەمەسە اپپاراتتىڭ ىستەن شىققانىن كورگەن ناۋقاستار بار قاراجاتىن جيناپ، ءدال وسى تەكسەرىستەن ءوتۋى ءۇشىن شەتەل اسادى»، - دەيدى سەرىك نۇركەنوۆ «نۇر وتان» پارتياسى استانا قالاسى «وركەنيەت» اۋماقتىق فيليالىنىڭ پارتيالىق جيىنىندا.

سونداي- اق، مامان الەمدەگى جاڭا تەحنولوگيالاردىڭ ونكولوگيالىق اۋرۋلاردى اناعۇرلىم ءتيىمدى ەمدەۋگە مۇمكىندىك بەرەتىنىن اتاپ ءوتتى.

«ماسەلەن، پروتوندىق تەراپيا ساۋ تىندەرگە زاقىم كەلتىرمەي، قاتەرلى ىسىك جاسۋشالارىن عانا ساۋلەمەن ەمدەۋگە مۇمكىندىك بەرەدى. وسىلايشا، بۇل اۋرۋلاردى ەمدەۋدىڭ تيىمدىلىگى مەن ساپاسىن ارتتىرۋعا بولادى. بۇل وتە قىمبات جانە اۋقىمدى قاراجاتتى تالاپ ەتەدى. ءبىراق، ءبىزدىڭ مەملەكەتكە بۇل قۇرىلعىلار اسا قاجەت»، - دەپ ءوز ءسوزىن تۇيىندەدى ول.

سونىمەن بىرگە، س. نۇركەنوۆ نازاربايەۆ ۋنيۆەرسيتەتى جانىنان جاڭا ونكولوگيالىق ورتالىقتىڭ قۇرىلىپ جاتقانىن حابارلادى. ونىڭ قىزمەتى ەرتە دياگنوستيكاعا جانە ءتۇرلى يادرولىق باعدارلامالارمەن ەمدەۋگە باعىتتالادى.