الماتىلىقتار قوقىستى وتكىزگەنى ءۇشىن اقشا الىپ جاتىر

الماتى. قازاقپارات - الماتىلىقتار قوقىستى دۇرىس وتكىزگەنى ءۇشىن اقشا، ءتۇرلى سىيلىقتار الىپ جاتىر. جينالعان قوقىستىڭ بارلىعى قايتا وڭدەۋگە جىبەرىلۋدە، دەپ حابارلايدى قازاقپارات ءتىلشىسى.

قازىر قالادا قاعاز، پلاستيك، پوليەتيلەن، شىنى قابىلدايتىن 7 پۋنكت ارنايى موبيلدى قوسىمشا ارقىلى جۇمىس جاسايدى. قوقىس جيناۋدىڭ جاڭا قوسىمشاسىن جاس ستارتاپەرلەر - حالىقارالىق ІТ  ۋنيۆەرسيتەتىنىڭ 4-كۋرس ستۋدەنتتەرىنىڭ كومانداسى ويلاپ تاپتى. جاڭا جوبا بىلتىر يننوۆاتسيالىق جوبالار ىشىندە ۇزدىك ستارتاپ جوبا دەپ تانىلعان بولاتىن.

«تازالىق» قوسىمشاسى Android پەن Ios پلاتفورمالارىنا جۇكتەلەدى. قازىر الماتىدا 700-گە تارتا تۇرعىن بۇل قوسىمشانى جۇكتەپ العان.

 «ەندى قالا تۇرعىندارى وتكىزگەن قوقىسى ءۇشىن اقشا الادى. ماسەلەن، ونىڭ ارنايى تاريفى بار. 10 كەلى قاعازعا 150 تەڭگە بەرىلەدى. ءار 1 كەلى قوقىسقا 1 بونۋس بەرىلەدى. 25 بونۋس العان تۇتىنۋشىلار كينوتەاترعا بيلەت نەمەسە مەدەۋگە سىرعاناققا بيلەت الادى»، - دەدى جوبا اۆتورلارىنىڭ ءبىرى ايبەك راحىم.

ونىڭ ايتۋىنشا، بەلسەندى ازاماتتارعا ارنايى پروفيل اشىلىپ، مارتەبە بەرىلەدى.

تۇتىنۋشىلاردىڭ بەلسەندىلىگى ارتقان سايىن ولاردىڭ قوسىمشاداعى مارتەبەسى دە وزگەرەتىن بولادى.

بەيجاي قارامايتىن ازاماتتار ەكولوگيا قامقورشىسىنا اينالادى.

«قازىردىڭ وزىندە بىزدە 30 شاقتى ەكو- قامقورشى بار. رەيتينگتە ءبىرىنشى ەرمەك احمەتوۆ دەگەن تۇرعىن تۇر. ول 1 توننا 500 كەلى قوقىس تاپسىرعان. قوسىمشادا موتيۆاتسيالىق اقپاراتتار بار. مىسالى 10 كەلى قاعاز وتكىزسە، كىشكەنە ءشوپ ءوسىپ تۇرادى. كەيىن ول شىبىققا، سوسىن تالعا اينالادى. سوندا ادامدار تابيعاتقا قانداي پايداسىن تيگىزىپ جاتقانىن انىق كورەدى»، - دەدى ايبەك راحىم.

 سونىمەن قاتار، ستۋدەنتتەر ءار عيماراتقا ۋرنالاردىڭ ورنىنان ەكولوگيالىق بوكس ورناتۋدى جوسپارلاپ وتىر.

وفيس قىزمەتكەرلەرى عيماراتتان شىقپاي- اق، پلاستيك پەن قاعاز قوقىستارىن ارنايى بوكستارعا سالادى.

ازىرگە مۇنداي قۇرىلعىلار AlmaU، حالىقارالىق ІТ  ۋنيۆەرسيتەتى مەن سمارت پوينت كوۆوركينگ ورتالىعىندا ورنالاسقان.

ەكى ايدان سوڭ پايدالانۋعا سمارت ەكو- بوكستارى بەرىلەدى.

«قازىر عيمارات يەلەرى كونتەينەردەگى قوقىستاردى سۆالكاعا الىپ كەتۋ ءۇشىن ءار كونتەينەرگە 2000 ت گ تولەيدى. ەگەر ءبىزدىڭ ارنايى سمارت ەكو- بوكستى ورناتاتىن بولسا، بۇل ولارعا ءتيىمدى بولار ەدى. سەبەبى قوقىس شىعارۋ ءۇشىن اقشا تولەمەيدى. ءبىز ونى ءوزىمىز كەلىپ الىپ كەتەمىز. سمارت بوكستاردىڭ ىشىندە ارنايى ۇساقتاعىش ۇستارا ورناتىلادى. تۇسكەن قوقىسقى مايدالاپ تۋراپ تاستايدى. سوندا جاشىككە 15 ەمەس 35 كەلى قوقىس سىياتىن بولادى. ءارى قالامىز تازا، ءارى قوقىس قايتا وڭدەۋگە جىبەرىلەدى»، - دەدى ايبەك راحىم.

جاس نوۆاتورلار الماتىنىڭ گۇلدەنۋى مەن تازالىعىنا باعىتتالعان جوباسى ءۇشىن ينۆەستور ىزدەپ جاتىر.

«ماسەلە اقشادا ەمەس. ءبىراق، ەگەر وسى جوبا بيزنەس قۇرىلىمىن قىزىقتىراتىن بولسا، ينۆەستور تاپساق جاقسى بولار ەدى. وندا بۇكىل قالانى وسىنداي قۇرالدارمەن قامتۋعا بولار ەدى»، - دەدى ا. راحىم.

اۆتور: گۇلميرا عوسمانالي