استانالىقتارعا ايالدامادا ىستىق شاي بەرىلىپ جاتىر
دەپ حابارلايدى «قازاقپارات» ح ا ا ءتىلشىسى.
«استانا جاستارى» جاستار رەسۋرستىق ورتالىعىنىڭ ەرىكتىلەرى ايازدى كۇنى وسىلاي جۇرتقا مەيىرىمدىلىك كورسەتىپ جاتىر. ساقىلداعان سارى ايازدا ايالدامادا اۆتوبۋس كۇتىپ قالعان ەلوردالىقتار ىستىق كوفە مەن شاي ءىشىپ بوي جىلىتىپ، قايىرىمدى جاستارعا العىستارىن بىلدىرۋدە. ايالداماعا جەتكەننەن كەيىن بەلسەندىلەر جۇمىسقا دەيىن جەتكىزىپ تاستايتىندارىن ايتىپ، حابار بەرەدى.
«ءبىز بۇگىن تاڭەرتەڭ ساعات جەتىدەن توعىزعا دەيىن قالالىقتارعا جۇمىستارىنا جەتىپ الۋعا كومەكتەستىك. كەشكى ساعات بەس پەن جەتىلەر اراسىندا تاعى جولعا شىعۋدى كوزدەپ وتىرمىز. ءۇش اۆتوكولىگىمىز بەن ءبىر «گازەلىمىز» بار. تۇرعىندار تەگىن اپارىپ تاستايتىنىمىزعا تاڭدانىپ جاتسا دا، كەيىن العىستارىن جاۋدىرادى»، - دەيدى «استانا جاستارى» ورتالىعىنىڭ ديرەكتورى مۇحامەدجان بولىسبەك.
ونىڭ ايتۋىنشا، بەلسەندىلەر اۋىسىم بويىنشا 15 ادامنان جۇمىس ىستەپ ءجۇر.
«ەرىكتىلەر رەتىندە كوبىنەسە كوللەدج بەن ۋنيۆەرسيتەتتەردىڭ ستۋدەنتتەرى كومەكتەسەدى. ءبىزدىڭ ورتالىقتىڭ بەلسەندىلەرى بار. ءبىز ادامدارعا كومەكتەسكىمىز كەلەدى»، - دەيدى ول.
ايتا كەتسەك، اتالعان ناۋقان «استانا - جاقسىلىق قالاسى» جوباسى اياسىندا 26 - قاڭتارعا دەيىن سوزىلماق.
ەسكە سالا كەتسەك، ايازعا بايلانىستى استانانىڭ مەشىتتەرى دە مۇقتاج ادامدارعا ارناپ تەگىن تاكسي قىزمەتىن ۇيىمداستىردى.
اۆتور: ايان بەكەن ۇلى
