جابىق كەشەندەگى ازيا چەمپيوناتى: قىتايدان كەيىنگى ەكىنشى ورىندامىز
اتالعان دودادا قازاقستان نامىسىن 25 جەڭىل اتلەت قورعايدى. وسىعان وراي ق ر جەڭىل اتلەتيكا فەدەراتسياسىنىڭ رەسمي سايتى اتالعان دودادا قازاقستان سپورتشىلارى قانشا مەدال جەڭىپ العانىن جاريا ەتتى.
فەدەراتسيا سايىتىنداعى مالىمەتتەرگە سۇيەنسەك، بۇل چەمپيونات 2004-جىلدان باستاۋ الادى. ەڭ العاش ۇيىمداستىرعان قالا - وسى تەگەران. وتانداستارىمىز وسى جىلدان بەرى قاراي جەتى رەت ايتۋلى دوداعا قاتىسىپ، جالپى 59 (20 التىن، 18 كۇمىس، 21 قولا) مەدال جەڭىپ الدى. مەدال سانى جونىنەن قىتايدان كەيىن ەكىنشى ورىندا تۇرمىز.
2004-جىلى (تەگەران)
ەڭ العاش تەگەراندا ۇيىمداستىرىلعان ازيا چەمپيوناتىندا قازاقستان قۇراماسى 7 (4 التىن، 2 كۇمىس، 1 قولا) مەدال جەڭىپ الدى. جالپى كوماندالىق ەسەپتە قىتاي مەن يراننان كەيىن ءۇشىنشى ورىنعا يە بولدى.
2006-جىلى (پاتتايا)
ال 2006-جىلى تايلاندتىڭ پاتتايا قالاسىندا قازاقستان قۇراماسى جالپى كوماندالىق ەسەپتە توپ جاردى. قىتاي مەن جاپونيا قۇراماسىن ارتقا تاستادىق. قورجىنعا 18 (7 التىن، 2 كۇمىس، 9 قولا) مەدال ءتۇستى.
2008-جىلى (دوحا)
دوحادان 14 (4 التىن، 6 كۇمىس، 4 قولا) مەدال بۇيىردى. جالپى كوماندالىق ەسەپتە ءۇشىنشى ورىنعا يە بولدى.
2010-جىلى (تەگەران)
العاش رەت قازاقستان قۇراماسى جالپى كوماندالىق ەسەپتە ۇزدىك ۇشتىككە ىلىنبەدى. بۇل جولى 4-ورىندى قاناعات تۇتۋعا تۋرا كەلدى. يران استاناسىندا 13 (3 التىن، 5 كۇمىس، 5 قولا) مەدال ەنشىلەدىك.
2012-جىلى (حانچجوۋ)
قىتايدىڭ حانچجوۋ قالاسىنداعى جابىق كەشەندەگى ازيا چەمپيوناتىندا تاعى دا ءتورتىنشى ورىندى قاناعات تۇتتىق. بۇل جولى مەدال سانى دا، التىن دا كەمي ءتۇستى. بار-جوعى 7 (2 التىن، 3 كۇمىس، 2 قولا) مەدالمەن شەكتەلدىك.
2014-جىلى (حانچجوۋ)
2014-جىلى تاعى دا جابىق كەشەندەگى ازيا چەمپيوناتىن حانچجوۋ وتكىزدى. جەرلەستەرىمىز مۇنىڭ الدىندا قاتارىنان ەكى رەت جالپى كوماندالىق ەسەپتە ءتورتىنشى السا، وسى جولى ۇشتىككە ءىلىندى. مەدال سانى - 12. ونىڭ تورتەۋى التىن بولدى.
2016-جىلى (دوحا)
كاتار استاناسى دوحادا وتانداستارىمىز جالپى كوماندالىق ەسەپتە ءۇشىنشى ورىنعا يە بولدى. وندا 10 مەدال (4 التىن، 2 كۇمىس، 4 قولا) بۇيىردى.
اۆتور: كۇنسۇلتان وتارباي
