ۆيتسە-پرەمەر ءومىرزاق شوكەيەۆ اگرارشىلارىمەن كەزدەستى

شىمكەنت. قازاقپارات - قازاقستان رەسپۋبليكاسىنىڭ ۆيتسە-پرەمەرى، اۋىل شارۋاشىلىعى ءمينيسترى ءومىرزاق شوكەيەۆ وڭتۇستىك قازاقستان وبلىسىنا ساپارمەن كەلدى.

مەملەكەت باسشىسىنىڭ «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىنداعى ءتيىستى باعىتتار بويىنشا اتقارىلاتىن شارالارمەن تانىسۋ ماقساتىندا وڭىردەگى اۋىل شارۋاشىلىعى ونىمدەرىن وندىرەتىن كاسىپورىندارعا بارىپ، شارۋا قوجالىقتاردىڭ جەتەكشىلەرىمەن كەزدەستى، دەپ حابارلايدى قازاقپارات.

وبلىس اكىمى باسپا ءسوز قىزمەتىنىڭ حابارلاۋىنشا، ءومىرزاق شوكەيەۆ اۋەلى ورداباسى اۋدانىنداعى «بورتە ميلكا» ءسۇت-تاۋار فەرماسىندا بولدى. ينۆەستيتسيالىق قۇنى 2,4 ميلليارد تەڭگە ءسۇت فەرماسىندا بۇگىندە 30 ادام جۇمىس ىستەيدى. گولشتەين فرەيس تۇقىمدى 400 سيىردان جىلىنا 4 مىڭنان توننادان استام ءسۇت ساۋىلادى. ايتا كەتەرلىگى، بۇل - ايماقتا العاش رەت وزىق تەحنولوگيانى پايدالانىپ وتىرعان كاسىپورىن. مۇندا تازالاۋ جانە ساۋۋ جۇمىستارىن تولىق روبوت تەحنيكا جۇزەگە اسىرادى.

ساپار بارىسىندا ءومىرزاق ەستاي ۇلى وڭىردەگى اۋىل شارۋاشىلىعى سالاسىنداعى شارۋالارمەن كەزدەسىپ، ماسەلەلەرىنە قانىقتى. وڭىردەگى شارۋالار ماقتا، جۇگەرى ونىمدەرىن ارتتىرۋ بويىنشا جانە قاراكول ەلتىرىسىن قايتا جاڭعىرتۋ جونىندە ءوز ويلارىن جەتكىزدى. ماسەلەگە قانىققان مينيستر ايتىلعان ۇسىنىستاردى ەسكەرىپ، ءتيىستى جۇمىستار اتقارىلاتىنىن ايتتى.

«اۋىل شارۋاشىلىعىنا بەرىلەتىن سۋبسيديا بۇگىنگى تاڭدا 240 ميلليارد تەڭگەگە جەتتى. بۇل ەلباسىنىڭ اتالعان سالاعا دەگەن قامقورلىعى. سونداي-اق، مەملەكەت باسشىسى اۋىل شارۋاشىلىعى ونىمدەرىن 2,5 ەسەگە كوبەيتۋ كەرەكتىگىن تاپسىردى. بۇل تۇرعىدا وڭتۇستىك قازاقستان وبلىسى - اگرارلى سالا ەكەندىگىن ەسكەرۋ كەرەك. ەت، ءسۇت، ماقتا ونىمدەرى مەن باقشا داقىلدارىن وندىرۋدە ءوڭىردىڭ ۇلەسى ەرەكشە. الداعى ۋاقىتتا ۇكىمەت ماجىلىسىندە جىلدىڭ جاڭا جوسپارىن بەكىتىپ، اۋىل شارۋاشىلىعىن وركەندەتۋ ءۇشىن تىڭ جوبالاردى قولعا الاتىن بولامىز»، - دەدى ءومىرزاق ەستاي ۇلى.

ساپار تۇركىستان قالاسى شاعا اۋىلدىق وكرۋگىندەگى «ەراسىل» جىلىجاي كەشەنىندە جالعاستى. جوبا قۇنى 70 ميلليون تەڭگەلىك كەشەن 0,35 گەكتار اۋماقتى الىپ جاتىر. وندا قازىرگى تاڭدا 5 ادام جۇمىس ىستەيدى. ءوڭىر باسشىسى رەسپۋبليكاداعى جىلىجايلاردىڭ 75 پايىزى وڭتۇستىك قازاقستان وبلىسىنا تيەسىلى ەكەندىگىن ايتتى.

«اۋىل شارۋاشىلىعىن قولداۋعا وتكەن جىلى جالپى 24,9 ميلليارد تەڭگە سۋبسيديا باعىتتالىپ، 40 مىڭعا جۋىق كاسىپورىن قولداۋعا يە بولدى. اۋىل شارۋاشىلىعىنىڭ جالپى ءونىم كولەمى وتكەن جىلى 522,4 ميلليارد تەڭگەگە جەتىپ، ءوسىم 102 پايىزدى قۇرادى. ال جىلىجاي كولەمى 2017-جىلى 212 گەكتارعا ارتىپ، جالپى 1335 گەكتارعا جەتتى. ەلباسى جولداۋىندا اۋىل شارۋاشىلىعى سالاسىنا ايرىقشا كوڭىل ءبولىندى. وسى ماقساتتا وڭىردە ونىمدىلىكتى ارتتىرۋ ءۇشىن وزىق تەحنولوگيانى پايدانالانۋعا بارىنشا باسىمدىق بەرەتىن بولامىز»، - دەدى جانسەيىت قانسەيىت ۇلى.

وڭتۇستىك قازاقستان وبلىسىنىڭ اۋىل شارۋاشىلىعى سالاسىمەن تانىسقان ءومىرزاق ەستاي ۇلى شارۋالاردىڭ جاساعان ۇسىنىستارىنىڭ ءتيىمدى تۇستارى نازارعا الىناتىندىعىن جەتكىزدى.