كونە قالالار تۋرالى فيلمنىڭ تۇساۋى كەسىلدى

شىمكەنت. قازاقپارات - وڭتۇستىك قازاقستان وبلىسىندا «ۇلى جىبەك جولى بويىنداعى كونە قالالار» اتتى دەرەكتى فيلمىنىڭ تۇساۋكەسەرى ءوتتى، دەپ حابارلايدى قازاقپارات ءتىلشىسى.

«وڭتۇستىك فيلم» مەكەمەسىنىڭ جەتەكشىلىگىمەن «ساق» كينوستۋدياسى تۇسىرگەن تۋىندىدا ورتاعاسىرلىق 8 ەسكەرتكىش تۋرالى باياندالادى. سونداي-اق، ەلباسىمىز ن. ءا. نازاربايەۆتىڭ «بولاشاققا باعدار: رۋحاني جاڭعىرۋ» ماقالاسى نەگىزىندە تۇسىرىلگەن دەرەكتى فيلم كونە تاريحي مول مۇرالارىمىزدى ناسيحاتتاۋ ارقىلى ۇرپاق ساناسىنا پاتريوتتىق سەزىمدى ءسىڭىرۋدى كوزدەيدى. وڭتۇستىكتەگى ەجەلگى، تاريحي، كيەلى ورىندارىمەن تانىستىرىپ، وتكەن مادەنيەتىمىزدى دارىپتەۋ جانە تابيعاتى اسەم جەرلەردى كورسەتۋ كوزدەلگەن. وسكەلەڭ ۇرپاققا ءوز ەلىنىڭ تاريحىن ۇعىندىرۋ، ۇلتجاندىلىق باعىتىنداعى تاربيە بەرۋ بولىپ تابىلادى.

فيلمنىڭ رەجيسسەرى باتىرحان داۋرەنبەكوۆ، وپەراتورى- ايدار مىرزاداۋلەتوۆ. ۇرپاققا مۇرا قۇندى دەرەككە باي فيلمنىڭ تۇساۋكەسەر ءراسىمى و ق و تاريحي-ولكەتانۋ مۋزەيىندە ءوتتى. دەرەكتى فيلمدە وڭىردەگى تاريحي ەسكەرتكىشتەر، كيەلى جەرلەر مەن اسەم تابيعاتقا يە سول زامانداعى ۇلى جىبەك جولى بويىندا ورنالاسقان ساۋران، وتىرار، ارىستانباب، تۇركىستان، قاراسپانتوبە، جۋانتوبە، كۇلتوبە قالاشىقتارى كورسەتىلەدى.

جاڭا تۋىندا الداعى ۋاقىتتا كورەرمەندەرگە جول تارتپاق.

اۆتور: اينۇر اقبايەۆا