شىعىس قازاقستاندا گەپاتيت دەرتىنە بايلانىستى جاڭا دەرەك شىقتى
«19 ادام تۋرالى اقپارات ەشقايدا جىبەرىلمەگەن، سوندىقتان ستاتيستيكاعا كىرمەي قالىپ، ورتالىقتان 12 ادام دەپ شىققان. بۇگىن قۇجاتتاردى قاراساق، 19 ادام وسى جەردە «ا» گەپاتيتىنە شالدىعىپتى. ازىرگە ءبىز تەكسەرگەن قۇجات بويىنشا 30 بولىپ تۇر. وبلىستان سۇراعان كەزدە نەگىزگى ستاتيستيكادان قاراپ وتىرادى عوي. ولار دا بىلمەيدى ءار اۋىلدا قانشا بولىپ جاتقانىن. ءبىراق اقپارات بەرمەگەنى ول ارينە، دۇرىس ەمەس بولدى»، - دەيدى ق ر د س م قوعامدىق دەنساۋلىق ساقتاۋ كوميتەتى ەپيدەميولوگيالىق قاداعالاۋ باسقارماسىنىڭ باسشىسى روزا قوجاپوۆا.
الايدا جەرگىلىكتى تۇرعىندار سارى اۋرۋعا شالدىققانداردىڭ سانى 50 گە جۋىقتاعانىنا سەنىمدى. ءتىپتى دارىگەردىڭ ءمورى باسىلىپ، اۋىرعان بالالاردىڭ ءتىزىمى كورسەتىلگەن قۇجاتتى دا كوميسسياعا كورسەتتى. ال مەديتسينا قىزمەتكەرلەرىنىڭ سالعىرتتىعىنان بالامنىڭ دەرتى اسقىنىپ، سارى اۋرۋدان كوز جۇمدى دەگەن ينديرا جانىبەكوۆا دارىگەرلەردى سوتقا بەردى. الايدا 11 جاستاعى قىزىنان ايىرىلعان انا ءىس بۇرمالانىپ كەتەدى مە دەپ ۇرەيلى.
سونداي-اق، شولپاندىقتار اۋىرعان بالالارىنىڭ امبۋلاتوريالىق كارتالارى جاپپاي تۇزەتىلىپ جاتىر دەپ دابىل قاعۋدا. ەندى ناۋقاستاردىڭ ناقتى سانىن جاسىرۋ، امبۋلاتوريالىق كارتالاردى وزگەرتۋ جانە بالا ولىمىنە قاتىستى قىلمىستىق ءىس تە رەسپۋبليكالىق كوميسسيامەن تەكسەرىلىپ، قورىتىندىسى قۇقىق قورعاۋ ورگانىنا بەرىلەدى.
ەستەرىڭىزگە سالا كەتەيىك، بۇعان دەيىن شولپان اۋىلىندا 49 بالانىڭ گەپاتيت «ا» دەرتىنە شالدىققانى جوققا شىعارىلىپ، تەك 12 بالانىڭ اۋىرعاندىعى جونىندە اقپارات جاريالانعان بولاتىن. سونداي-اق ق ر دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ كوميتەتىنىڭ ءتوراعاسى، باس سانيتارلىق دارىگەر جانداربەك بەكشين استانادا وتكەن بريفينگتە 12 بالانىڭ گەپاتيتكە شالدىعۋىنىڭ سەبەبىن ايتقان ەدى.
