قاتال قىستاعى قامقورلىق: استانالىقتار ايازدا ءبىر- بىرىنە كومەك قولىن سوزىپ جاتىر

استانا. قازاقپارات - استانا قالاسىنىڭ تۇرعىندارى قالانىڭ مەملەكەتتىك قىزمەتشىلەرىنىڭ ءبىر- بىرىنە كومەك بەرۋ باستاماسىنا ءۇن قوستى، دەپ حابارلايدى «قازاقپارات» ح ا ا ءتىلشىسى.

ەسكە سالا كەتسەك، استانادا اركتيكالىق اياز تۇسكەلى بەرى قالا اكىمى اسەت يسەكەشيەۆ باستاعان شاھار باسشىلىعى اۋا رايىنىڭ قاتال كەزەڭىندە الەۋمەتتىك جەلى قولدانۋشىلارىنا ءبىر- بىرىنە كومەك قولىن سوزۋعا شاقىرعان بولاتىن.

«مەيىرىمدى بولايىق. جاقسىلىق جاساۋ تۇككە تۇرمايدى عوي. ەگەر ءسىز كولىك تىزگىنىندە وتىرىپ، ايالدامادا تۇرعان ادامدى كورىپ قالساڭىز، ءوتىپ كەتپەي جەتكىزىپ تاستاۋدى ۇسىنىڭىز. ەگەر اۆتوكولىگىن وتالدىرا الماي جۇرگەن بىرەۋدى كورسەڭىز، ءمان بەرمەي كەتپەڭىز. اۆتوكولىكتەگىلەر جاياۋ جۇرگىنشىلەردى وتكىزىپ جىبەرىڭىزدەر»، - دەپ جازدى Facebook پاراقشاسىندا «سارى ارقا» اۋدانىنىڭ اكىمى ارمان تۇرلىبەك.

استانا تۇرعىندارى كاسىپكەرلەرگە ادامداردىڭ جىلىنىپ الۋى ءۇشىن شارۋاسىن جۇرگىزىپ وتىرعان عيماراتىنا كىرگىزۋگە، ىستىق شاي بەرۋگە، تاكسيشىلەرگە باعانى وسىرمەۋگە شاقىردى.

«ەگەر ەگدە تارتقان كورشىلەرىڭىز بولسا، نە كەرەكتىگىن سۇراڭىز. كوممەرتسيا يەلەرى - جىلىنۋعا كەلگەن ادامدى قۋىپ شىقپاڭىز. ءۇيسىز جانۋارلار مەن قۇستارعا جەم بەرىڭىز. ەگەر اتا- انالارىندا كولىك بولماسا، بالالارىڭىزدىڭ سىنىپتاستارىن كولىكپەن جەتكىزىپ تاستاۋعا تىرىسىڭىز»، - دەيدى استانالىق تۇرىك ەتنومادەني ورتالىعىنىڭ ءتوراعاسى اسكەر پيريەۆ.

ەڭ قۋانارلىعى، قالالىقتار مۇنداي ۇندەۋگە اتسالىسىپ جاتىر. الماگۇل امىرگەرەيەۆا ءوزىنىڭ الەۋمەتتىك جەلىدەگى پاراقشاسىنا: «جىبەك جولىندا تۇرامىن. سول جاعالاۋدا ساعات كەشكى 19:00 ۋاقىتىنا دەيىن جۇمىس ىستەيمىن. ۇيگە قايتاردا جول- جونەكەي، اسىرەسە، ەگدە ادامداردى، ايەلدەر مەن بالالاردى الىپ كەتە الامىن» دەپ جازدى.

مۇنداي سيپاتتاعى فلەشموبتى ديلارا بايجۇمانوۆا دا قولدادى.

«اكىمدى قولدايمىن. ساعات 7:40-تا (اپتانىڭ سوڭىنا دەيىن) ەۋرازيانىڭ شۇبار جاعىنا دەيىن اپارىپ تاستاي الامىن»، - دەيدى ول Facebook جەلىسىندەگى «استانا، حوچۋ پوحۆاليت/پوجالوۆاتسيا» توبىندا.

قالالىقتاردىڭ ءبىرى ءوزىنىڭ كومەگىن ۇسىنىپ جاتسا، ەكىنشىسى العىسىن ءبىلدىرىپ جاتىر. ماسەلەن، قايرات تورەقۇلوۆ ەسىمدى ادام بۇگىن ساعات 09:00-دە «اقبۇلاق-3» اۋدانىندا قارا لەكسۋس مىنگەن بويجەتكەن توقتاپ، سول جاعالاۋعا دەيىن بارار بولسا، اپارىپ تاستايتىنىن ايتقان.

«ءبىراق مەنىڭ ءوزىم ابىلايحان جاققا بارا جاتقانمىن. ءبىراق، الگى كىسىنىڭ ادامدىق قارىم- قاتىناسىنا ريزا بولدىم. ءبىزدىڭ قالالىقتار وتە مەيىرىمدى. ەگەر وسى جازبانى وقىپ وتىرعان بولساڭىزدار، سىزگە كوپ راحمەتىمدى ايتقىم كەلەدى. قالالىقتار وسىنداي قيىن اۋا رايى كەزىندە ءبىر- بىرلەرىڭىزگە كومەكتەسىڭىزدەر»، - دەيدى ول اتالعان توپتا.

بۇل حابارلامانىڭ استىنا پىكىر قالدىرعان Slushash Ismaqambetova ەسىمدى قولدانۋشى ءوزىنىڭ باسىنان وتكەنىن جازادى.

«مەنىڭ اۆتوكولىگىم سونشالىقتى قىمبات ەمەس. ءبىراق، جول بويىندا بالا ۇستاعان انانى كورسەم، اقشا سۇراماستان جەتكىزىپ تاستايمىن. ءوز باسىمنان دا بۇل جاعداي وتكەن. قالاعا دەيىن جەتە الماي، جول بويىندا بىردە- ءبىر كولىكتىڭ توقتاماي قويعانى ەسىمدە. دالادا جاڭبىر قۇيىپ تۇرعان ەدى. سول كەزدە مەن وزىمە «كولىگىم بولسا، مىندەتتى تۇردە جول بويىندا قالعان ادامداردى الىپ كەتەمىن» دەپ سەرت بەرگەن ەدىم»، - دەپ جازادى ول.

ءوز كەزەگىندە بوتاگوز اعداربەكوۆا تەگىن ءجۇرىپ جۇرگەن كولىك جۇرگىزۋشىلەرىنە العىسىن ءبىلدىردى.

«استانادا مەيىرىمدى جاندار بارشىلىق. مەنى تەگىن جەتكىزىپ تاستادى. العىسىم زور»، - دەيدى ول.

ءبىراق، بۇگىنگى كۇنى جاقسىلىق جاساپ جاتقاندار تەك قانا اۆتوكولىك يەلەرى عانا ەمەس. تاڭەرتەڭ استانالىق ءدارىحانالاردىڭ ءبىرىنىڭ سىرتىندا ىستىق شاي ىشۋگە بولاتىنىن جازىلعان حابارلاما ىلىنگەن. ول جايلى Talgat Aliev ەسىمدى قالا تۇرعىنى جازدى.

«ءدارىحانا اكىمشىلىگى جاقسىلىق جاساۋ كەرەكتىگىن تانىتا ءبىلدى. جارايسىڭدار!» - دەپ جازدى ول.

ارمان تۇرلىبەكتىڭ ايتۋىنشا، ءاربىر ادام جاقسىلىق جاساي الادى.

«سەنىمدى بولىڭىزدار! ءسىز تانىتقان مەيىرىمدىلىك اينالىپ كەلىپ ءوزىڭىزدى نەمەسە جاقىندارىڭىزدى تابادى. قامقورلىق تانىتا بىلىڭىزدەر. جاقسىلىق ەشقاشان كوپ بولمايدى»، - دەيدى ول.

 ەسكە سالا كەتسەك، استاناعا تۇسكەن اياز قالالىقتاردى ايتارلىقتاي اۋرەگە سالىپ تۇر. اسىرەسە، قازاقستاننىڭ سولتۇستىگى مەن شىعىسىندا كۇن رايى ەرەكشە قاتال كۇيگە ەنگەن. جۋىق ارادا ەلىمىزدىڭ باسقا وبلىستارىنا دا شىڭىلتىر اياز جەتەدى دەپ كۇتىلىپ وتىر. ورتالىق جانە شىعىس اۋماقتاردا تۇندە اۋا رايى 40-45 گرادۋسقا دەيىن تومەندەۋى ىقتيمال.

اۆتور: ايان بەكەن ۇلى