19:11, 22 - قاڭتار 2018 | GMT +5
شۆەتسيادا كاسىپقوي بوكسقا تىيىم سالىنۋى مۇمكىن
استانا. قازاقپارات - شۆەتسيادا كاسىپقوي بوكسقا ءبىرجولا تىيىم سالىنۋى مۇمكىن. بۇل بوكسشىلاردىڭ اۋىر جاراقات الۋىمەن بايلانىستىرىلىپ وتىر. كاسىپقوي بوكسقا تىيىم سالۋ جايى بوكسشى ەريك سكوگلۋندتىڭ سپاررينگ كەزىندە العان جاراقاتىنان كەيىن ايتىلا باستادى.
بۇكىل الەمدىك بوكس سۋپەرسەرياسىنىڭ بۇرىنعى قاتىسۋشىسى كەزەكتى كەزدەسۋىنە دايىندىعى كەزىندە باسىنان اۋىر جاراقات الىپ، ميى شايقالعان. اۋرۋحانانىڭ جانساقتاۋ بولىمىنە ءتۇسىپ، دارىگەرلەر بوكسشىنى امان الىپ قالعان. قازىرگى تاڭدا ەريك ەمىن ۇيىندە جالعاستىرۋدا. شۆەتسيادا وسىعان دەيىن دە كاسىپقوي بوكس قاتاڭ باقىلاۋدا بولاتىن. جوعارىداعى جاعدايدان كەيىن ەل سپورتىنىڭ باسشىلىعى مەن ەڭبەكتى قورعاۋ اگەنتتىگى بۇل سپورت تۇرىنە قاتىستى ناقتى شەشىم شىعارۋ جايىن جاقىن كۇندەرى تالقىلايدى.
اقپارات كوزى: vesti.kz
