ق ر اۋىل شارۋاشىلىعى ءمينيسترى ءىس- ساپارمەن وڭتۇستىك قازاقستان وبلىسىندا بولدى - فوتو

شىمكەنت. قازاقپارات - قازاقستان رەسپۋبليكاسىنىڭ ۆيتسە- پرەمەرى - اۋىل شارۋاشىلىعى ءمينيسترى ءومىرزاق شوكەيەۆ وڭتۇستىك قازاقستان وبلىسىنا ءىس- ساپارمەن كەلدى. مينيستر وڭىردەگى اۋىل شارۋاشىلىعى ونىمدەرىن وندىرەتىن كاسىپورىندارعا بارىپ، شارۋا قوجالىقتاردىڭ جەتەكشىلەرىمەن كەزدەستى،

 دەپ حابارلايدى قازاقپارات ءتىلشىسى.

 مەملەكەت باسشىسىنىڭ «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىنداعى ءتيىستى باعىتتار بويىنشا اتقارىلاتىن شارالارمەن تانىسۋ ماقساتىندا كەلگەن ءومىرزاق ەستاي ۇلى وڭىردەگى اۋىل شارۋاشىلىعى سالاسىنداعى شارۋالارمەن كەزدەسىپ، ماسەلەلەرىنە قانىقتى. وڭىردەگى شارۋالار ماقتا، جۇگەرى ونىمدەرىن ارتتىرۋ بويىنشا جانە قاراكول ەلتىرىسىن قايتا جاڭعىرتۋ جونىندە ءوز ويلارىن جەتكىزدى. ماسەلەگە قانىققان مينيستر ايتىلعان ۇسىنىستاردى ەسكەرىپ، ءتيىستى جۇمىستار اتقارىلاتىنىن ايتتى.

«اۋىل شارۋاشىلىعىنا بەرىلەتىن سۋبسيديا بۇگىنگى تاڭدا 240 ميلليارد تەڭگەگە جەتتى. بۇل - ەلباسىنىڭ اتالعان سالاعا دەگەن قامقورلىعى. سونداي- اق، مەملەكەت باسشىسى اۋىل شارۋاشىلىعى ونىمدەرىن 2,5 ەسەگە كوبەيتۋ كەرەكتىگىن تاپسىردى. بۇل تۇرعىدا وڭتۇستىك قازاقستان وبلىسى - اگرارلى سالا ەكەندىگىن ەسكەرۋ كەرەك. ەت، ءسۇت، ماقتا ونىمدەرى مەن باقشا داقىلدارىن وندىرۋدە ءوڭىردىڭ ۇلەسى ەرەكشە. الداعى ۋاقىتتا ۇكىمەت ماجىلىسىندە جىلدىڭ جاڭا جوسپارىن بەكىتىپ، اۋىل شارۋاشىلىعىن وركەندەتۋ ءۇشىن تىڭ جوبالاردى قولعا الاتىن بولامىز»، - دەدى ءومىرزاق ەستاي ۇلى.

 مينيستر ساپار بارىسىندا، سونداي- اق، ورداباسى اۋدانىنداعى «بورتە ميلكا» ءسۇت- تاۋار فەرماسىندا بولدى. تۇركىستان قالاسى شاعا اۋىلدىق وكرۋگىندەگى «ەراسىل» جىلىجاي كەشەنىن كورىپ، جوبالىق قۇنى 70 ميلليون تەڭگەنى قۇرايتىن كەشەننىڭ جۇمىسىمەن تانىستى. وسى رەتتە وبلىس اكىمى جانسەيىت تۇيمەبايەۆ رەسپۋبليكاداعى جىلىجايلاردىڭ 75 پايىزى وڭتۇستىك قازاقستان وبلىسىنا تيەسىلى ەكەندىگىن ايتتى.

 «اۋىل شارۋاشىلىعىن قولداۋعا وتكەن جىلى جالپى 24,9 ميلليارد تەڭگە سۋبسيديا باعىتتالىپ، 40 مىڭعا جۋىق كاسىپورىن قولداۋعا يە بولدى. اۋىل شارۋاشىلىعىنىڭ جالپى ءونىم كولەمى وتكەن جىلى 522,4 ميلليارد تەڭگەگە جەتىپ، ءوسىم 102 پايىزدى قۇرادى. ال جىلىجاي كولەمى 2017 -جىلى 212 گەكتارعا ارتىپ، جالپى 1 335 گەكتارعا جەتتى. ەلباسى جولداۋىندا اۋىل شارۋاشىلىعى سالاسىنا ايرىقشا كوڭىل ءبولىندى. وسى ماقساتتا وڭىردە ونىمدىلىكتى ارتتىرۋ ءۇشىن وزىق تەحنولوگيانى پايدانالانۋعا بارىنشا باسىمدىق بەرەتىن بولامىز»، - دەدى جانسەيىت قانسەيىت ۇلى.

وڭىردەگى اۋىل شارۋاشىلىعى سالاسىمەن تانىسقان ءومىرزاق ەستاي ۇلى شارۋالاردىڭ جاساعان ۇسىنىستارىنىڭ ءتيىمدى تۇستارى نازارعا الىناتىندىعىن جەتكىزدى.

اۆتور: اينۇر اقبايەۆا