ەكس-مينيستر بيشىمبايەۆ ءىسى بويىنشا سوتتا جاڭا ايىپتاۋ اكتىسى وقىلدى

استانا. قازاقپارات - ەلىمىزدىڭ بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ ىسىنە قاتىستى سوتتا پروكۋرورلار جاڭا ايىپتاۋ اكتىسىن وقىدى، دەپ حابارلايدى قازاقپارات.

«بۇل قىلمىستىق ءىس بويىنشا جەدەل شارالار 2016-جىلدىڭ اقپانىنان باستاپ جۇرگىزىلدى. قىلمىستىق ءىس 2016-جىلدىڭ 9- تامىزىندا تىركەلدى. شامامەن 7-8 اي بويى تەرگەۋ جۇرگىزىلىپ، ناتيجەسىندە ايىپتاۋ اكتىسى جاسالدى. اتالعان ايىپتاۋ اكتىسىندە ءبىزدىڭ قورعالۋشىمىز (قۋاندىق بيشىمبايەۆ) قاشان، قايدا، قانداي جاعدايدا، قانداي تۇلعالاردىڭ قاتىسۋىمەن بەلگىلى ءبىر قىلمىستى جاساعانى جان-جاقتى باياندالعان. بۇگىن ايتارلىقتاي وزگەرىستەرگە ۇشىراعان جاڭا ايىپتاۋ جاريا ەتىلدى. كەيبىر تۇلعالاردىڭ باپتارى وزگەردى. ءبىزدىڭ قورعالۋشىمىزعا قاتىستى باپ سول كۇيىندە قالىپ وتىر. دەگەنمەن، قاتىسۋشىلاردىڭ قۇرامى ايتارلىقتاي وزگەرگەندىگىنە نازار اۋدارتقىم كەلەدى»، - دەدى سوت وتىرىسىنان كەيىن ب ا ق وكىلدەرىنە ادۆوكات ءسالىمجان مۋسين.

ونىڭ ايتۋىنشا، قورعالۋشىنىڭ سىبايلاستارىنىڭ قاتارىنان ءبىرقاتار تۇلعا شىعارىلعان.

«ءىس جۇزىندە ەكى جىل بويى ايىپتاۋ بارىسىندا ءبىزدىڭ قورعالۋشىمىزدى بەلگىلى ءبىر تۇلعالاردىڭ قاتىسۋىمەن قانداي دا ءبىر قىلمىستاردى جاسادى دەپ كەلدى. سوت تەرگەۋى بارىسىندا ءبىز مۇنىڭ شىندىققا جاناسپايتىندىعىن دالەلدەدىك. ءبىر-بىرىنە قاراما-قايشى بولعان بارلىق دەرلىك دالەلدەردى تەكسەرىپ شىقتىق. اتالعان قاراما-قايشىلىقتاردى الىپ تاستاپ، ءبىزدىڭ كوزقاراسىمىزشا قورعالۋشىمىزعا اتالعان قىلمىستاردى جاسادى دەگەن زاڭسىز ايىپ تاعىلعاندىعىن ءىس جۇزىندە دالەلدەدىك»، - دەدى مۋسين.

ءسالىمجان مۋسيننىڭ اتاپ وتۋىنشە، جاڭا ايىپتاۋ اكتىسىنە بايلانىستى كەيبىر دالەلدەردى زەرتتەۋگە قايتارۋ جوسپارلانىپ وتىر.

«نەگىزىندە سولاي بولاتىندىعىنا كۇدىكتەنبەيمىز دە. ءبىز سونى تاباندى تۇردە تالاپ ەتەتىن بولامىز»، - دەدى ول.

ايتا كەتەرلىگى، سوت وتىرىسى بارىسىندا پروكۋرور الىبەك ايتجانوۆ قۋاندىق بيشىمبايەۆتى مەملەكەتتىك قىزمەتتى ورىنداۋعا وكىلەتتى تۇلعا بولا وتىرىپ، دەلدالدار ارقىلى ءىرى كولەمدە پارا الدى دەپ ايىپتاعان بولاتىن.

ەسكە سالا كەتسەك، 2017-جىلدىڭ 10- قاڭتارىندا سىبايلاس جەمقورلىققا قارسى ۇلتتىق بيۋرو بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ ۇستالعانىن حابارلاعان بولاتىن. ۇلتتىق بيۋرودان ءمالىم ەتكەندەي، ول ءبىرقاتار اداممەن الدىن الا كەلىسىپ، ءىرى كولەمدە بىرنەشە مارتە پارا الدى دەپ ايىپتالۋدا.

بيشىمبايەۆ قىزىلوردا قالاسىندا اينەك شىعاراتىن جانە وڭدەيتىن زاۋىت سالۋ بارىسىندا «Orda Glass» ج ش س- نىڭ ۆەدومستۆولىق باعىنىستاعى كومپانياسى مەن ونىڭ مەردىگەرلىك ۇيىمى «شىمكەنت حيممونتاج» ج ش س ارقىلى 1 ميلليارد تەڭگە جىمقىرۋ قىلمىستىق سحەماسىن ۇيىمداستىردى دەگەن كۇدىككە ءىلىندى.

وتكەن جىلدىڭ 12- قاڭتارى كۇنى استانا قالاسى الماتى اۋداندىق 2№ سوتى قۋاندىق بيشىمبايەۆقا قاتىستى ونى «قاماۋعا الۋ» تۋرالى سانكسيا بەردى. تەرگەۋ نۇسقاسى بويىنشا، بيشىمبايەۆ زاڭسىز جولمەن العان اقشالاي قاراجاتتارىن جەكە قاجەتتىلىكتەرىنە جۇمساعان.

اۆتور: مارلان جيەمباي