14:30, 22 - قاڭتار 2018 | GMT +5
اقمولا وبلىسىندا بىرنەشە ادام ايازدا ءۇسىپ ءولدى
كوكشەتاۋ. قازاقپارات - اقمولا وبلىسىندا سۋىققا قاتىپ قالعان 3 ادامنىڭ مۇردەسى تابىلدى، دەپ حابارلايدى قازاقپارات ءتىلشىسى.
وبلىستىق ءى ءى د باسپا ءسوز قىزمەتىنىڭ مالىمەتى بويىنشا، العاشقى جاعداي 20- قاڭتار كۇنى شۋچينسك قالاسىندا بولعان. كۇندىزگى ساعات 15:50 دەردە ارىقتا قاتىپ قالعان 1980-جىلعى ەر ادامنىڭ دەنەسى تابىلدى.
ال، 21- قاڭتار كۇنى تاعى دا شۋچينسك قالاسىندا جەكەمەنشىك ءۇيدىڭ اۋلاسىندا سۋىقتا ءۇسىپ ولگەن 1967-جىلعى ايەلدىڭ دەنەسى تابىلدى. ايەل جەرگىلىكتى تۇرعىننىڭ ۇيىندە بولمە جالداپ تۇرعانى انىقتالدى.
سول كۇنى شورتاندى اۋدانىنىڭ دامسا اۋىلىندا كوشەدە قاتىپ قالعان 1954-جىلعى ەر ادامنىڭ دەنەسى تابىلدى.
