يتالياداعى جارىستا قازاقستاننىڭ بياتلون قۇراماسىنا ءتىنتۋ جاسالدى
دەپ حابارلايدى قازاقپارات حالىقارالىق بياتلونشىلار وداعىنا (IBU) سىلتەمە جاساپ.
«حالىقارالىق بياتلونشىلار وداعى 2017 - جىلى حوحفيلتسەندە وتكىزگەن الەم چەمپيوناتىنا بايلانىستى اۆستريا قىلمىستىق ورگاندارى جۇرگىزگەن تەرگەۋ ناتيجەسى بويىنشا جانە بولتسانو پروكۋرورىنىڭ وردەرىنە سايكەس، يتاليالىق پوليتسەيلەر ءتىنتۋ جۇرگىزدى. ءتىنتۋ بياتلوننان قازاقستان قۇراماسى ورنالاسقان مەكەن جايدا جانە ولاردىڭ كولىكتەرىندە جۇرگىزىلدى. ءتىنتۋ ناتيجەسى ءالى بەلگىسىز. حالىقارالىق بياتلونشىلار وداعى ءتىنتۋ ناتيجەسى الىنعاننان كەيىن عانا رەسمي تۇردە تەكسەرىسكە كىرىسەدى»، - دەلىنگەن IBU سايتىندا.
اتاپ وتىلگەندەي، پوليتسەيلەر تىيىم سالىنعان پرەپاراتتاردى ىزدەگەن.
ەسكە سالايىق، بۇل بياتلوننان ق ر قۇراماسىمەن بولىپ وتىرعان ءبىرىنشى وقيعا ەمەس. وتكەن جولى ەۋروپانىڭ جانار ماي قۇيۋ بەكەتتەرىنىڭ بىرىندە قوقىس جاشىگىنەن قازاقستاندىق سپورتشىلاردىڭ قۇجاتتارى مەن ءدارى- دارمەكتەردىڭ قالدىقتارى تابىلعان بولاتىن. وسىدان كەيىن قۇراماعا ءتىنتۋ جاسالدى.
وسى كۇندەرى يتاليانىڭ انتحولتس- انتەرسەلۆا ەلدى مەكەنىندە بياتلوننان الەم كۋبوگىنىڭ التىنشى كەزەڭى ءوتىپ جاتىر. وندا قازاقستاننىڭ ەرلەر جانە ايەلدەر قۇراماسى سىنعا تۇسۋدە.
19 - قاڭتار كۇنى ايەلدەر مەن ەرلەر اراسىندا جارىستار سپرينتتەن، 20 - قاڭتاردا ىزگە ءتۇسۋ سايىسىنان ءوتتى. 21 - قاڭتار كۇنى ماسس- ستارتتان جوسپارلانعان.
اۆتور: ميرا تولەندى قىزى
