ديماش قۇدايبەرگەن «تيتانيك» تەلەفيلمىنىڭ ءانىن جازعان ۋولتەر افاناسەففپەن بىرگە ءان جازىپ جاتىر

استانا. قازاقپارات - قازاقستاندىق ءانشى ديماش قۇدايبەرگەن «گرەممي» سىيلىعىنىڭ يەگەرىمەن بىرگە ءان ايتادى، دەپ حابارلايدى قازاقپارات. 

 «جاقىن ارادا گرەممي جۇلدەسىنىڭ يەگەرىمەن دايىنداپ جاتقان دۋەتىمىزدى كۇتىڭىزدەر...»، - دەپ جازدى ديماش ينستاگرامداعى پاراقشاسىنا. دەگەنمەن ول ناقتى كىممەن بىرگە ءان شىرقايتىنىن جازبادى.

ايتا كەتسەك، وتكەن جىلدىڭ قاراشا ايىندا ديماش قۇدايبەرگەن لوس- اندجەلەستە بەلگىلى پروديۋسەر، كومپوزيتور، گرەممي سىيلىعىنىڭ يەگەرى ۋولتەر افاناسەففپەن كەزدەستى.

 «بۇگىن مەن تاماشا كىسىنىڭ ۇيىندە بولدىم. ول «GRAMMY»  جۇلدەسىنىڭ ەكى دۇركىن يەگەرى. مايكل دجەكسون، مارايا كەري، ۋيتني حيۋستون سىندى ءىرى تۇلعالارمەن جۇمىس جاساعان ۇلى كومپوزيتور جانە پروديۋسەر. سەلين ديون ورىنداعان «تيتانيك» تەلەفيلمىنىڭ ساۋندترەگى «My heart will go on» ءانىن دە دۇنيەگە الىپ كەلگەن - وسى ۋولتەر مىرزا. «قۇبىجىق پەن سۇلۋ»، «الاددين» (1992)، «جەكە قورعاۋشى» (1992)، «سەن عانا» (1994)، «گەركۋلەس»، «ويىن» (1997)، «بوتەن قارىنداس» (1999)، «ءۇي كۇتۋشى حانىم» (2002). دجەيمس بوندتىڭ «ولىمگە بەرىلگەن رۇقساتناما» فيلمدەرىنىڭ اندەرىن جازعان كىسى. قانشا جەردەن تاريحي جوبالاردا بوي كورسەتسە دە، وتە قاراپايىم، وتە سىپايى. الداعى ۋاقىتتا قۋانتامىز»، - دەپ جازعان ەدى ديماش ينستاگرامدا.

ەسكە سالايىق، وسى كۇندەرى قازاقستاندىق ءانشى D-Dynasty  الەمدىك تۋرنەسىمەن قىتايدا ونەر كورسەتۋدە. ءانشى اسپان استى ەلىنىڭ ءبىرقاتار قالاسىندا كونسەرتتەرىن بەرىپ ۇلگەردى، ولاردىڭ اراسىندا فۋجوۋ، چاڭشا قالالارى بار.

اۆتور: ميرا تولەندى قىزى