قايرات ءابدىراحمانوۆ نيۋ- يوركتە ەكىجاقتى بىرنەشە كەزدەسۋ وتكىزدى
بۇل تۋرالى «قازاقپارات» ح ا ا ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
اتاپ ايتقاندا، قازاقستاندىق سىرتقى ساياسات ۆەدومستۆوسىنىڭ باسشىسى رەسەي، قىرعىزستان، تاجىكستان مەن كۋۆەيت ەلدەرىندەگى ءوز ارىپتەستەرىمەن، سونداي- اق ب ۇ ۇ باس حاتشىسىمەن كەزدەستى.
رەسەيدىڭ سىرتقى ىستەر ءمينيسترى سەرگەي لاۆروۆپەن كەزدەسۋدە ارىپتەستەر دوستىق ماندەگى ءداستۇرلى قالىپتا ەكىجاقتى قارىم- قاتىناستىڭ دامۋىن تالقىلاپ، جاھاندىق جانە ايماقتىق ماسەلەلەرگە بايلانىستى پىكىرلەرىمەن ءبولىستى. كەزدەسۋ بارىسىندا ب ۇ ۇ قاۋىپسىزدىك كەڭەسىنىڭ كۇن تارتىبىندەگى ماسەلەلەر ايتىلىپ، اتالعان سۇراقتارعا بايلانىستى استانا مەن ماسكەۋدىڭ ۇستانىمىنىڭ جاقىندىعى دالەلدەنە ءتۇستى. قايرات ءابدىراحمانوۆ 2017 -جىل بويى استانانىڭ ب ۇ ۇ قاۋىپسىزدىك كەڭەسى قۇرامىنداعى جۇمىسىنا قولداۋ بىلدىرگەنى ءۇشىن رەسەيلىك ارىپتەسىنە العىس ءبىلدىردى. ءوز كەزەگىندە سەرگەي لاۆروۆ قازاقستاننىڭ قاۋىپسىزدىك كەڭەسىندەگى ءتوراعالىق قىزمەتىنە جوعارى باعا بەردى.
قىرعىزستاننىڭ سىرتقى ىستەر ءمينيسترى ەرلان ابدىلدايەۆپەن بولعان كەزدەسۋدە قازاقستاننىڭ سىرتقى ساياسات ۆەدومستۆوسىنىڭ باسشىسى ايماقتىق جانە جان- جاقتى ماسەلەلەردى تالقىلاپ، ەكىجاقتى ىنتىماقتاستىقتىڭ وزەكتى ماسەلەلەرىن، سونىڭ ىشىندە قىرعىزستان پرەزيدەنتى سوورونباي جەيەنبەكوۆتىڭ وتكەن جىلدىڭ سوڭىندا استاناعا رەسمي ساپارى بارىسىندا قول جەتكىزىلگەن كەلىسىمدەردىڭ ىسكە اسىرىلۋىن قاۋزادى.
قايرات ءابدىراحمانوۆ تاجىكستاننىڭ سىرتقى ىستەر ءمينيسترى سيرودجيد اسلوۆپەن استانا مە دۋشانبەنىڭ ايماقتىق جانە ەكىجاقتى ىنتىماقتاستىعىن تالقىلادى. تاجىك ديپلوماتى قازاقستاننىڭ قاۋىپسىزدىك كەڭەسىندەگى ءبىرىنشى رەت ءتوراعالىق ەتۋىنە جانە اۋعانستان مەن ورتالىق ازياداعى قاۋىپسىزدىك ماسەلەلەرىنە بايلانىستى دەباتتىڭ شاقىرىلۋىنا جوعارى باعا بەردى.
قازاقستاننىڭ سىرتقى ىستەر ءمينيسترى سونىمەن بىرگە كۋۆەيت مەملەكەتىنىڭ سىرتقى ىستەر ءمينيسترى - پرەمەر- ءمينيستردىڭ ورىنباسارى شەيح ساباح ءال- حالەد اس- ساباحپەن كەزدەسۋ وتكىزدى. كەزدەسۋ بارىسىندا تاراپتار ەكىجاقتى ىنتىماقتاستىقتى دامىتۋ جولدارىمەن قاتار، ورتاق مۇددە تۇرعىسىندا ءبىرقاتار حالىقارالىق ماسەلەلەر بويىنشا پىكىر الماستى. قايرات ءابدىراحمانوۆ بۇۇ اياسىندا ءبىرسىپىرا حالىقارالىق جوبالاردىڭ باستاماشىسى بولىپ جۇرگەن كۋۆەيتتىڭ بەلسەندى ءرولىن ەرەكشە اتاپ ءوتىپ، قاۋىپسىزدىك كەڭەسىندەگى تۇراقتى ەمەس مۇشە رەتىندە بۇل ەلدىڭ جاھاندىق قاۋىپسىزدىكتى نىعايتۋدا ءوز ۇلەسىن قوساتىنىنا سەنىم ءبىلدىردى.
19- قاڭتار كۇنى قازاقستان س ءى م باسشىسى ءداستۇرلى تۇردە اي سايىن وتەتىن ب ۇ ۇ باس حاتشىسى انتونيۋ گۋتەرريشتىڭ قاۋىپسىزدىك كەڭەسىنە تۇراقتى مۇشە- مەملەكەتتەردىڭ وكىلدەرىمەن كەزدەسۋىنە قاتىستى. قايرات ءابدىراحمانوۆ قاتىسۋشىلاردى سيريا ماسەلەسى بويىنشا استانا پروتسەسىنىڭ جۇمىس بارىسىمەن تانىستىردى. قازاقستاندىق ديپلومات ءوز سوزىندە استانا الاڭى سيرياداعى قارۋلى قاقتىعىستى توقتاتۋعا ايتارلىقتاي ۇلەس قوسىپ، ب ۇ ۇ ۇرانى بويىنشا جەنيەۆاداعى كەلىسسوز پروتسەسىنە قوسىمشا دەم بەرىپ وتىرعانىن اتاپ ءوتتى. كەزدەسۋگە قاتىسۋشىلار سونىمەن بىرگە، كولۋمبياداعى احۋالدى، سونداي- اق ب ۇ ۇ بىتىمگەرلىك ميسسياسىنىڭ قاۋىپسىزدىگىن قامتاماسىز ەتۋدىڭ ماڭىزدى شارتتارىن تالقىلادى.
اۆتور: ايان بەكەن ۇلى
