زينەدين زيدان باس باپكەرلىك قىزمەتتەن كەتپەك
مامانداردىڭ ايتۋىنشا كوماندانىڭ ءساتسىز ويىنى مەن سىرتقى الەمنەن تۇسكەن جان توزگىسىز قىسىم فرانسۋز مامانىن شارشاتىپ جىبەرگەن. ول ءدال مىناداي قىسىم استىندا جۇمىس جاساۋدىڭ قيىندىعىن سەزىنگەن كورىنەدى.
ءبىراق، ءدال قازىر كەتسە دە زيداننىڭ وكىنۋىنە ەش سەبەپ جوق. ەكى جىلدا كومانداعا سەگىز بىردەي چەمپيوندىق اتاق جەڭىپ الىپ بەردى. لا ليگادا جەڭىمپاز بولعانىن ايتپاعان كۇننىڭ وزىندە، قاتارىنان ەكى مارتە چەمپيوندار ليگاسىن جەڭىپ العانىنىڭ ءوزى نەگە تۇرادى.
دەسە دە، «رەال مادريد» سىندى كلۋبتا تابان تەرەپ تۇرۋ ءۇشىن بۇل دا جەتكىلىكسىز. قاشان كومانداعا كومەكتەسۋگە جاراماي قالاسىڭ، سول كەزدە ورىنىڭدى بوساتۋعا تۋرا كەلەدى. مەيلى اتاقتى زينەدين زيدان بولساڭ دا!
زيداننىڭ كومانداسى لا ليگاداعى باستى قارسىلاسى «بارسەلونادان» 19 ۇپايعا قالىپ كەتتى. چەمپيوندار ليگاسى مەن يسپان كۋبوگىنداعى جورىعىن ءالى جالعاستىردا دەگەنىڭىزبەن، ءدال مىناداي سۇرەڭسىز ويىنىمەن ۇزاققا شاباتىندارىنا سەنۋ قيىن.
زيزۋدىڭ كورولدىق كلۋبپەن كەلىسىمشارتى 2018 -جىلعا دەيىن جاسالعان. ءوزى كەيدە كوماندامەن 2020 -جىلعا دەيىن كەلىسىمىم بار دەپ ءجۇر. ءبىراق، ءبىز بىلگەندە ەكى تاراپ ءالى جاڭا شارت جاساسا قويعان جوق. ءتىپتى، اياقتالماعان كەلىسىم مەرزىمى بار بولعان كۇننىڭ وزىندە بۇنىڭ زيداندى كوماندادا الىپ قالۋى ەكىتالاي.
داڭىقتى ويىنشى زينەدين زيدان فۋتبولشىلىق مانسابىن 2006 -جىلى ءدال وسى «رەال مادريد» ساپىندا اياقتادى. سول كەزدە ونىڭ كوماندامەن كۇشىنە يە كەلىسىمشارتى بار بولاتىن. گەرمانيادا وتكەن الەم چەمپيوناتىن وكىنىشپەن اياقتاعان فرانسيا قۇراماسىنىڭ كاپيتانى مادريدتە جالعاستى دوپ تەبە بەرۋىنە بولار ەدى. ءبىراق، زيدان جاراقاتىنا بايلانىستى بۋتساسىن شەگەگە ىلگەن ەدى.
ەندى 12 جىلدان كەيىن سول جاعداي قايتالانۋ الدىندا تۇر. 2017 -جىلعى الەمنىڭ ۇزدىك باپكەرى زينەدين زيدان دا قالجىراتقان كوڭىل جاراقاتىنا بايلانىستى باپكەرلىك تىزگىنىن باسقاعا وتكىزىپ بەرۋى مۇمكىن.
