قازاقستاندىق شەنەۋنىكتەر قانشا ايلىق الادى؟
«بۇگىنگى تاڭدا مەملەكەتتىك قىزمەتشىنىڭ ايلىعى ەكى كريتەري، ياعني ەڭبەك ءوتىلى مەن لاۋازىم ساناتتارى بويىنشا بەرىلەدى. سىيلىقاقى سەكىلدى ىنتالاندىرىلاتىن تولەمدەر ەرەجە بويىنشا بىردەي مولشەردە تاعايىندالادى. بۇل جۇيە 14 جىل بۇرىن ەنگىزىلىپ، سودان بەرى وزگەرتىلمەگەن»، - دەيدى اتالعان اگەنتتىكتىڭ وكىلى.
ايگۇل شايىموۆا ءوز سوزىندە، ەڭبەكاقىنى تولەۋدىڭ جاڭا جۇيەسى ورتالىق پەن وڭىرلەردىڭ ەڭبەكاقىسىنىڭ ۇيلەسىمىنە وڭ ءاسىرىن تيگىزەتىنىن اتاپ ءوتتى.
«وڭىرلەردەگى مەملەكەتتىك قىزمەتكەرلەردىڭ ايلىعى مينيسترلىكتە ەڭبەك ەتەتىندەرگە قاراعاندا ايىرماشىلىعى بار. ماسەلەن، وبلىس اكىمدىگى اپپاراتىنىڭ باس مامانى ورتالىقتاعى باستى ساراپشىدان 70 پايىزعا تومەن ايلىق الادى. جاڭا جۇيەنى ەنگىزە وتىرىپ، ءبىز بۇل ايىرماشىلىقتاردى 10 پايىزعا قىسقارتامىز»، - دەيدى ول.
سونداي-اق، جاڭا جۇيەنىڭ تاعى ءبىر ەرەكشەلىگى جايلى ايتىلدى. ناقتىراق ايتقاندا، ەنگىزىلگەلى جاتقان تىڭ جۇيە مەملەكەتتىك قىزمەتتەگى جالپى ءوتىل مەن ناقتى لاۋازىمداعى جۇمىستىڭ تاجىريبەسىن ەسەپكە الماق. جالپى ەڭبەك ءوتىلى مەملەكەتتىك قىزمەتكە كىرىسكەن ۋاقىتتا ەسەپتەلە باستاسا، ناقتى لاۋازىمدا ەڭبەك ەتۋ جالاقى بەلگىلەۋ بارىسىنا اسەر ەتەتىن بولادى.
«ەگەر كەڭسەنىڭ باس مامانى ءبىر مەملەكەتتىك ورگاننان ەكىنشىسىنە اۋىسىپ جاتسا، ونىڭ الدىڭعى جۇمىستاعى ەڭبەك ءوتىلى جاڭا جۇمىس ورنىنداعى ايلىعىن بەلگىلەۋدە دە ەسەپكە الىناتىن بولادى»، - دەيدى ول.
ايگۇل شايىموۆانىڭ ايتۋىنا قاراعاندا، اتالعان جوبا پيلوتتىق تارتىپتە جۇرگىزىلىپ جاتىر. جوبانىڭ سىناعىنا مەملەكەتتىك قىزمەت ىستەرى جانە جانە سىبايلاس جەمقورلىققا قارسى ءىس-قيمىل اگەنتىگى، ادىلەت مينيسترلىگى، استانا قالاسى مەن ماڭعىستاۋ وبلىسىنىڭ اكىمدىگى قاتىسۋدا. اتالعان ۆەدومستۆولار مەن اكىمدىكتەر قاڭتار ايىنان باستاپ جاڭا جۇيە بويىنشا ەڭبەكاقى الا باستايدى.
«جاڭا سحەما بويىنشا وڭىرلەردەگى مەملەكەتتىك قىزمەتشىلەردىڭ ايلىعى وسەتىن بولادى. ماسەلەن، وبلىستىق دەڭگەيدە ايلىقتىڭ ەڭ تومەنگى مولشەرى - 62 مىڭنان 17 مىڭعا دەيىن بولىپ وتىر. بۇل جەردە ءسوز وبلىس اكىمدىكتەرىنىڭ جەتەكشى ماماندارى تۋرالى ايتىلىپ تۇرعانىن جەتكىزگىم كەلەدى. ورتالىقتا ايلىق - 84-136 مىڭ شاماسىندا. پيلوتتىق جوبانىڭ سوڭىنا قاراي، بۇل جۇيەنى رەسپۋبليكالىق دەڭگەيدە ەنگىزۋ تۋرالى شەشىم قابىلدانادى»، - دەيدى ايگۇل شايىموۆا.
اۆتور: ايان بەكەن ۇلى
