ش. ايمانوۆ اتىنداعى «قازاق فيلم» جاڭا مۋلتفيلمنىڭ تانىستىرىلىمىن جاريالادى - كەسكىن

استانا. قازاقپارات - ش. ايمانوۆ اتىنداعى «قازاق فيلم» كينوستۋدياسى «مۇزبالاق» اتتى تولىقمەتراجدى كوركەم انيماتسيالىق فيلمنىڭ ترەيلەرىن جاريالادى، دەپ حابارلايدى قازاقپارات.

«ەكى جىل كولەمىندە جاسالعان بۇل فيلم بويىنشا 40 قا جۋىق وتاندىق انيماتور جۇمىس ىستەدى. ۇزاقتىعى 65 مينۋتتى قۇرايتىن مۋلتفيلم 2D جانە 3D فورماتىندا تۇسىرىلگەن جانە ءار سەكۋندىندا 24-25 كادر سۋرەت سالىنعان. كەيىپكەرلەردى دىبىستاۋعا ەرجان جارىلقاسىن ۇلى، جانات تىنىبايەۆ، سامات قورداباي، ەرعالي تولەبايەۆ، الما ءادىل قىزى ەسىمدى تەاتر جانە كينو اكتەرلەرى قاتىستى»، - دەپ اتاپ وتىلگەن «قازاق فيلمنىڭ» باسپا ءسوز قىزمەتىنىڭ مالىمەتىندە.

بۇركىت پەن ادامنىڭ دوستىعى تۋرالى باياندايتىن بۇل مۋلتفيلم ق ر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن. فيلمدى رەجيسسەر- انيماتور -تۇردىبەك مايدان جانە تىلەك تولەۋعازى جاساپ شىققان.

«بەس جاسار بۇركىتتى قازاق مۇزبالاق دەيدى. قازاق بۇل تاكاپپار قۇسقا جاس ەرەكشەلىگىنە قاراي ات قويادى. ءبىز اڭعا شىقپاساق تا، اڭشىلاردىڭ اڭگىمەسىن تىڭداپ وستىك. ۇلكەندەرمەن ەرىپ، اڭدى قالاي تۇزاققا تۇسىرۋگە بولاتىنىن دا شەت جاعالاپ كوزىمىزبەن كوردىك. قىراندى قالاي قوندىرىپ، تۇعىرىنا قالاي وتىرعىزۋ قاجەتتىگىن، اتتى قالاي باپتاپ، قالاي جاراتاتىنىن، قۇستى قالاي قولعا ۇستاۋعا بولاتىنىن بىزدەي ەشكىم بىلمەسى انىق»، - دەدى تۇردىبەك مايدان.

ەستەرىڭىزگە سالا كەتەيىك، كينوستۋديا 2017-جىلى تولىقمەتراجدى ەكى انيماتسيالىق فيلم شىعاردى. سونىڭ ءبىرى «مۇزبالاق» بولسا، ەكىنشىسى رەجيسسەر اداي ءابىلدانىڭ تاريحي تۇلعا، قولباسشى كۇلتەگىن تۋرالى كارتيناسى. اتالعان فيلمدەر تولىققاندى اياقتالعان جانە پروكاتى مەن تۇساۋكەسەرى ۇستىمىزدەگى جىلدىڭ كوكتەمىنە جوسپارلانعان.

اۆتور: رۋسلان عابباسوۆ