نۇرسۇلتان نازاربايەۆ: يادرولىق دەرجاۆا بولعانىمىزدا بۇگىنگىدەي جەتىستىككە جەتپەيتىن ەدىك

نيۋ-يورك. قازاقپارات - يادرولىق دەرجاۆا بولعانىمىزدا سولتۇستىك كورەيا سياقتى بولار ەدىك. بۇگىن ا ق ش- قا رەسمي ساپارىن قورىتىندىلاپ، قازاقستاندىق جانە شەتەلدىك ب ا ق وكىلدەرىنە سۇحبات بەرگەن ەلباسى نۇرسۇلتان نازاربايەۆ وسىلاي دەدى، دەپ حابارلايدى قازاقپارات.

«ا ق ش، رەسەي جانە قىتايدان كەيىنگى الەمدەگى ءتورتىنشى يادرولىق ارسەنالدان سانالى تۇردە باس تارتتىق. بىزدە 1100 وقتۇمسىق، امەريكا قۇراما شتاتتارىنىڭ تەرريتورياسىنا دەيىن جەتە الاتىن 110 دانا س س-18 زىمىراندارى بولدى. سول كەزدە ولاردى قالدىرىپ، يادرولىق دەرجاۆاعا اينالۋ، بارلىعىن قورقىتۋ توڭىرگەندە كوپتەگەن پىكىرتالاس بولدى. دەگەنمەن حالىق مەنىڭ شەشىمىمە قولداۋ كورسەتتى جانە ءبىز دۇرىس جاسادىق»، - دەدى نۇرسۇلتان نازاربايەۆ.

ەلباسى سونىڭ ارقاسىندا قازاقستان 25 جىلدىڭ ىشىندە الەمنىڭ بارلىق ەلدەرىنىڭ سەنىمىنە يە بولىپ، حالىقارالىق ارەنادا بەدەلى وسكەنىن، 300 ميلليارد دوللاردان استام تىكەلەي شەتەل ينۆەستيتسياسىن تارتا العانىن، سول ينۆەستيتسيالار ەل ەكونوميكاسىن كوتەرگەندىگىن ايتتى.

«ال ەگەر ءبىز يادرولىق دەرجاۆا بولعانىمىزدا قازىر سولتۇستىك كورەيا سياقتى بولار ەدىك. سوندىقتان دا ءبىزدىڭ يادرولىق قارۋدان باس تارتقان ەل رەتىندە مورالدىق قۇقىمىز بار. مەن وسى مورالدىق قۇقىعىمىزدى پايدالانا وتىرىپ، يرانمەن، ءوزىم جاقسى بىلەتىن پرەزيدەنتى حومەينيمەن سويلەسىپ، ءبىزدىڭ باس تارتقانىمىزدى ايتتىم. «سىزدەر 10 اتوم بومباسىنا يە بولارسىزدار، ال الەمدە ولاردىڭ سانى 7,5 مىڭ. ال بۇل تاۋەلسىزدىككە قورعان بولا ما؟»، دەدىم. تاۋەلسىزدىكتى بارلىق مەملەكەتتەرمەن جاقسى قارىم-قاتىناس، ەلدىڭ بەدەلى، يگى ەسىمى بەرەدى. ءدال سول سياقتى سولتۇستىك كورەياعا دا ءسوز ارناپ، يادرولىق قارۋدىڭ تاۋلەسىزدىكتىڭ تىرەگى ەمەس كەرىسىنشە قوزدىرعىشى بولاتىندىعىن ايتامىن. قازىر ولار توقتاپ، بۇكىل الەمگە باس تارتاتىندىعىن ايتار بولسا، ءبىز سياقتى تاتۋ-ءتاتتى قارىم-قاتىناستى ولار دا الا الار ەدى. ودان كەيىن ينۆەستيتسيا كەلىپ، ول ەلدى دامىتىپ، حالىقتىڭ تۇرمىس-تىرشىلىگى جاقسارا تۇسەدى»، - دەدى نۇرسۇلتان نازاربايەۆ.

اۆتور: مارلان جيەمباي