اقتوبەدەگى ءورت قىلمىستىق ءىس ەمەس، قايعىلى جاعداي - ق ر ءى ءى م

اقتوبە. قازاقپارات - اقتوبەدەگى اۆتوبۋس ءورتى قىلمىستىق ءىس ەمەس، قايعىلى جاعداي. بۇل تۋرالى «اقتوبە اقپارات» ورتالىعىندا وتكەن باسپا ءسوز ءماسليحاتىندا ايتىلدى، دەپ حابارلايدى قازاقپارات ءتىلشىسى.

اقتوبەگە كەلگەن ارنايى كوميسسيا تۇندە باسپا ءسوز ءماسليحاتىن وتكىزدى. ىشكى ىستەر ءمينيسترىنىڭ ورىنباسارى ەرلان تۇرعىمبايەۆ، دەنساۋلىق ساقتاۋ ۆيتسە-ءمينيسترى الەكسەي تسوي، ينۆەستيتسيا جانە دامۋ ۆيتسە-ءمينيسترى رومان سكليار باسپا ءسوز ءماسليحاتىنا قاتىستى.

«جولاۋشىلار اۆتوبۋسى جانىپ، 52 ادام قازا بولعانى بەلگىلى. قازىر 5 ادام اۋرۋحانادا جاتىر. ولار ءوز كۇشىمەن اۆتوبۋس ىشىنەن شىعىپ ۇلگەرگەن. ءتىرى قالعانداردىڭ ۇشەۋى قازاقستان ازاماتى. جۇرگىزۋشى نۇرجان قىرعىزبايەۆ 50 جاستا، ول وڭتۇستىك قازاقستان وبلىسىنىڭ تۇرعىنى. ونىڭ كومەكشىسى ماقسات پەرنەبەكوۆ 1985 -جىلى تۋعان ازامات. ول دا وڭتۇستىك قازاقستان وبلىسىنىڭ تۋماسى. جولاۋشى بولات تاڭاتاروۆ 1986-جىلى تۋعان. ەكى وزبەكستان ازاماتى دا بار. ۇكىمەت جانىنان قۇرىلعان كوميسسيا مۇشەلەرى وقيعا ورنىنا بارىپ، جاعدايمەن تانىستى. تەرگەۋ توبى ءالى جۇمىس جۇرگىزىپ جاتىر. ونىڭ ناتيجەسى جاقىن ارادا بەلگىلى بولادى»، - دەدى ينۆەستيتسيا جانە دامۋ ۆيتسە-ءمينيسترى رومان سكليار.

ايتا كەتەيىك، 18- قاڭتار كۇنى تاڭەرتەڭ سامارا-شىمكەنت تاسجولىندا جول اپاتى بولىپ، جولاۋشىلارعا تولى اۆتوبۋس جانىپ كەتتى. ءورت كەزىندە 52 ادام قازا بولىپ، 5 ادامدى كۇيىك شالدى. قازىر كۇيىك شالىپ، گازعا ۋلانعاندار اقتوبە وبلىستىق جەدەل جاردەم اۋرۋحاناسىندا ەم قابىلداپ جاتىر. ولاردىڭ ۇشەۋى قازاقستان، ەكەۋى وزبەكستان ازاماتى.

«اۋا رايىنىڭ قولايسىزدىعى تەرگەۋ جۇمىستارىن قيىنداتتى. قازىرگى كەزدە 44 مۇردە انىقتالدى. ادامداردىڭ دەنەسىن قاتتى كۇيىك شالىپ، كەيبىرەۋلەرىن انىقتاۋ مۇمكىن بولماي جاتىر. سوندىقتان ولاردىڭ بارلىعىن اقتوبە قالاسىنىڭ ءمايىتحاناسىنا اكەلىپ، ادامداردىڭ اتى- ءجونىن انىقتاۋ جۇمىستارىن جالعاستىرامىز. تاياۋ كۇندەرى تەرگەۋ اياقتالادى. سول كەزدە ءورتتىڭ ناقتى سەبەبى انىق بولادى. ناقتىلاساق، ول جەردە جول- كولىك وقيعاسى بولماعان. اۆتوبۋس جولدىڭ ۇستىندە تۇر. تەحنيكالىق اقاۋى جوق. قىلمىس بەلگىلەرى انىقتالمادى. بۇل قايعىلى جاعداي بولۋى دا مۇمكىن. زاتتاي ايعاقتار، امان قالعان ادامداردىڭ جاۋاپتارى وسىنى دالەلدەيدى. ءورت الدىمەن اۆتوبۋس سالونىنان شىققان. سودان جولاۋشىلار ۋلانىپ، سىرتقا دەر كەزىندە شىعا الماي قالعان»، - دەدى ىشكى ىستەر ءمينيسترىنىڭ ورىنباسارى ەرلان تۇرعىمبايەۆ.

كوميسسيا مۇشەسى ەرلان تۇرعىمبايەۆتىڭ ايتۋىنشا، اۆتوبۋس ىشىندە جۇك كوپ بولعان. ءبىرىنشى قاباتىندا جۇك تيەلىپ، ەكىنشى قاباتىندا جولاۋشىلار وتىرعان.

«الدىن الا بەلگىلى ءورت شىققان كەزدە جۇرگىزۋشى جولاۋشىلارىن قۇتقارماق بولعان. بۇل ەشقانداي دا قىلمىس ەمەس، قايعىلى جاعداي»، - دەدى ەرلان تۇرعىمبايەۆ.

اۆتور: التىناي ساعىندىقوۆا