نۇرسۇلتان نازاربايەۆ تاراتپاۋ سالاسىنداعى سەنىمدى نىعايتۋدىڭ ءبىرقاتار شاراسىن ۇسىندى

نيۋ-يورك. قازاقپارات - يادرولىق قارۋدى تاراتپاۋ تۋرالى شارتتان شىعۋ پروتسەسىن قيىنداتۋ قاجەت.

بۇل تۋرالى بۇگىن ب ۇ ۇ قاۋىپسىزدىك كەڭەسىنىڭ «جاپپاي قىرىپ-جوياتىن قارۋدى تاراتپاۋ: شارالار مەن سەنىم» تاقىرىبىنداعى وتىرىسىندا ءسوز سويلەگەن قازاقستان پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات.

وتىرىس بارىسىندا قازاقستان پرەزيدەنتى تاراتپاۋ سالاسىنداعى سەنىمدى نىعايتا ءتۇسۋ ءۇشىن ءبىرقاتار شارا ۇسىندى.

«ءبىرىنشى. يادرولىق قارۋدى تاراتپاۋ تۋرالى شارتتان شىعۋ پروتسەسىن قيىنداتۋ قاجەت دەپ سانايمىن. ق ح د ر- دىڭ ارەكەتى يادرولىق قارۋدى يەلەنسەم دەگەن امبيتسياسى بار باسقا ەلدەردى وسىنداي قادامعا يتەرمەلەۋى مۇمكىن. يادرولىق قارۋدى تاراتپاۋ تۋرالى شارتقا كۇمان كەلتىرمەي، بۇل شارتتى بۇزاتىن ەلدەر ءۇشىن وسىنىڭ ناقتى سالدارىن ايقىندايتىن بۇۇ قاۋىپسىزدىك كەڭەسىنىڭ ارنايى قارارىن ازىرلەۋ مۇمكىندىگىن قاراستىرۋدى ۇسىنامىن»، - دەدى ق ر پرەزيدەنتى.

مەملەكەت باسشىسى ەكىنشىدەن، جاپپاي قىرىپ-جويۋ قارۋلارىن يەمدەنۋگە جانە تاراتۋعا قاتىستى قاتاڭ شارا قولدانۋدىڭ ناقتى جۇمىس ىستەيتىن مەحانيزمىن ازىرلەۋ كەرەكتىگىن باسا ايتتى.

«مۇنداي كوپجاقتى كەلىسىمدەردى ب ۇ ۇ قاۋىپسىزدىك كەڭەسىنىڭ جەكەلەگەن قارارلارىندا بەكىتۋ قاجەت. جاپپاي قىرىپ-جويۋ قارۋلارىن يەمدەنۋ نيەتىنە جول بەرمەۋدىڭ باستى شاراسى رەتىندە اتوم قارۋىن يەلەنۋدەن ەرىكتى تۇردە باس تارتقان جانە يادرولىق قارۋى جوق مەملەكەتتەرگە يادرولىق دەرجاۆالاردىڭ بەرەتىن كەپىلدىگىن زاڭ جۇزىندە مىندەتتەيتىن جۇيەنى دامىتۋ قاجەت»، - دەدى نۇرسۇلتان نازاربايەۆ.

ۇشىنشىدەن، ەلباسى جاھاندىق قاۋىپسىزدىك جۇيەسىن جاڭارتۋ پروتسەسىنىڭ ءساتتى نەمەسە ءساتسىز بولۋى الەمدىك قوعامداستىقتىڭ ميليتاريستىك اناحرونيزمدى ەڭسەرۋ قابىلەتىنە تىكەلەي بايلانىستى ەكەندىگىن اتاپ ءوتتى.

«ەش ماعىناسى جوق ءارى ارانداتۋشىلىق تۋعىزاتىن اسكەري بلوكتارعا ءبولىنۋدى وتكەننىڭ ۇلەسىنە قالدىرۋ كەرەك. ءدال وسى تۇستا مەملەكەتتەر اراسىنداعى سەنىم اسا قاجەت. مەن سوعىسقا قارسى جالپى الەمدىك شارالار تۋرالى كوزقاراسىمدى «الەم، XXI عاسىر» اتتى مانيفەسىمدە ءبىلدىردىم. بۇل قۇجاتتا ب ۇ ۇ- نىڭ 100 جىلدىعى قارساڭىندا يادرولىق قارۋدان ازات الەم قۇرۋعا جاعداي جاسايتىن ءىس-قيمىلداردى ۇسىنعان ەدىم»، - دەدى نۇرسۇلتان نازاربايەۆ.

تورتىنشىدەن، قازاقستان پرەزيدەنتى حالىقارالىق قارىم-قاتىناسقا ساياسي سەنىم مەن جۇيەلى ديالوگتى مىندەتتى تۇردە قايتارۋ كەرەكتىگىن اتاپ ءوتتى.

«ءىس-قيمىلدى تولىقتاي قامتيتىن بىرلەسكەن جوسپار سونىڭ جارقىن مىسالى بولماق»، - دەدى ەلباسى.

اۆتور: مارلان جيەمباي