وزبەكستان شەتەلدەگى ەلشىلەرىنە تاۋلىگىنە بەس تۋريستەن تارتۋ تۋرالى تالاپ قويدى

استانا. قازاقپارات -  وزبەكستاننىڭ شەتەلدەگى ەلشىلەرىنە قويىلاتىن تالابى كۇشەيتىلدى. ديپلوماتتار تاۋلىگىنە كەم دەگەندە بەس تۋريست تارتۋى كەرەك.

 وزگە ەلدەگى وكىلدەرىن كەرى شاقىرىپ العان شاۆكات ميرزيەيەۆ ماسەلەنى وسىلاي توتەسىنەن قويدى.

ال قازاقستان مەن وزبەكستان اراسىنداعى ءوزارا بايلانىس وزگەلەرگە ۇلگى ەكەنىن اتاپ ءوتتى. ەكى ەل اراسىنداعى اعىن سۋدى ورتاق پايدالانۋ جونىندەگى كەلىسىمگە كەلۋ، شەكاراداعى بارىس- كەلىستىڭ جاقسارۋى جانە اۆتوباعىتتىڭ اشىلۋى باۋىرلاس ەلدەردىڭ دوستىعىن نىعايتاتىندىعىن جەتكىزدى. سونداي- اق وزبەكستان سىرتقى ىستەر مينيسترلىگىنىڭ جانە ەلشىلەردىڭ قىزمەتىن جان- جاقتى زەرتتەپ، تۇبەگەيلى جاقسارتۋ ماقساتىندا ارنايى كوميسسيا قۇرىلدى. 15 كۇننىڭ ىشىندە ءتىپتى اتتەستاتسيا تاپسىرادى. الداعى اتقاراتىن جۇمىستارىن جۇيەلەي الماعان ديپلومات جۇمىسقا جىبەرىلمەيدى.

 شاۆكات ميرزيەيەۆ، وزبەكستان رەسپۋبليكاسىنىڭ پرەزيدەنتى:

 - ەندى ءاربىر ەلشى جۇمىس كۇنىن وزىنە بەكىتىلگەن ايماق اكىمدەرىنە قوڭىراۋ شالىپ كەڭەسۋدەن باستايدى. ەكسپورت پەن تۋريزمدى دامىتۋ، ينۆەستيتسيا- بيزنەس سالاسىن كۇشەيتۋ ماقساتىندا ناقتى جوسپارلاردى تەزدەتىپ جۇزەگە اسىرۋ جولدارىن قاراستىرادى.

 ءبىر ناقتى ايتا كەتەتىن جايت، وسى جيىننان كەيىن ەلشىلەر وزىنە بەكىتىپ بەرگەن اۋماقتار مەن كاسىپورىندارعا بارىپ، ىنتىماقتاستىق جونىندەگى ناقتى جوبالارىن جاساۋى ءتيىس. ەرتەڭىن بولجاي الماعان ەلشى قىزمەتىنە جىبەرىلمەيدى.

www.24.kz