قوستانايدا جاڭا بوكسيت كەنىشتەرى اشىلدى
«2018 -جىلعا ارنالعان وندىرىستىك جوسپاردى تولىق ورىنداۋ ءۇشىن ايات كەنىشىنىڭ №9 جانە كراسنوگور كەنىشىنىڭ №17 كارەرىن پايدالانۋعا بەرىپ وتىرمىز. اتالعان نىسىنداردىڭ قۇرىلىسى ەكى جىل بۇرىن قولعا الىندى. بۇگىندە №17 كارەردەگى كەننىڭ العاشقى تونناسى ءوندىرىلدى. جىل اياعىنا دەيىن 1 ميلليون توننا شاماسىندا بوكسيت كەنىن ءوندىرۋ جوسپارلاندى. ال، ايات كەنىشىنىڭ №9 كارەرىندە بوكسيتتىڭ ءوندىرىسى جاقىندا باستالادى. ونىڭ ۇزىندىعى - 700, ەنى - 600, تەرەڭدىگى 119 مەتر بولادى» ، - دەيدى كراسنووكتيابر بوكسيت كەن باسقارماسىنىڭ ديرەكتورى سەرگەي شەلوكوۆ.
سونىمەن قاتار بوكسيت توگەتىن قويماعا اپارار تاسجولدىڭ قۇرىلىسى دا اياقتالدى. سۋ تارتقىش پەن ءۇش ەلەكتر جەلىسى تارتىلدى. جالپى، ءوندىرىس الاڭىنا بەس ەكسكاۆاتور، توعىز جۇك كولىگى، ءۇش بۋلدوزەر مەن ءبىر اۆتوگرەيدەر جۇمىلدىرىلعان.
شەلوكوۆتىڭ ايتۋىنشا، كراسنووكتيابر بوكسيت كەن باسقارماسىندا تاعى ءبىر كارەردىڭ قۇرىلىسى ءجۇرىپ جاتىر. جوسپار بويىنشا ول 2020 -جىلى قولدانىسقا بەرىلەدى.
اۆتور: قاسقىرباي قويشىمانوۆ
