بەيجىڭدە «سيفرلىق قازاقستان» مەن «سيفرلىق جىبەك جولىنىڭ» بايلانىستارى ءسوز بولدى
تاراپتار «سيفرلىق قازاقستان» مەن «سيفرلىق جىبەك جولى» باعدارلامالارىنىڭ بايلانىسىن ءسوز ەتتى. سونىمەن قاتار ولار قازاقستاننىڭ «قورعاس» حالىقارالىق شەكاراارالىق ىنتىماقتاستىق ورتالىعىن (ح ش ى و) پايدالانا وتىرىپ، ترانسشەكارالىق ەلەكتروندى ساۋدانى دامىتۋ ماسەلەسىن تالقىعا سالدى. ح ش ى و ايماعىندا تاۋارلار مەن ازاماتتاردىڭ تولىق ەسەبىن جۇرگىزۋگە مۇمكىندىك بەرەتىن جەلىلىك باقىلاۋ ورناتۋ مۇمكىندىگىنە بايلانىستى ماسەلەگە جانە «ءبىر تەرەزە» قاعيداتىمەن كورسەتىلەتىن لوگيستيكالىق قىزمەتتەردىڭ ساپاسىن ارتتىرۋعا ەرەكشە ءمان بەرىلدى.
بۇل ءوز كەزەگىندە ق ر الەۋەتىن ارتتىرىپ، شاعىن جانە ورتا بيزنەسىنىڭ ونىمدەرىن قىتايعا ترانسشەكارالىق ەلەكتروندى كوممەرتسيا پلاتفورماسى ارقىلى ەكسپورتىن ۇلعايتىپ، سوڭعى ساتىپ الۋشىلارعا تاۋاردى «B2B» (business-to-business) جانە «B2C» (business-to-consumer) فورماتىندا جەتكىزۋگە مۇمكىندىك تۋعىزادى.
ش. نۇرىشيەۆ زاماناۋي تەحنولوگيالاردى پايدالانۋ مەن ترانسشەكارالىق ەلەكتروندى كوممەرتسيانى نىعايتۋدىڭ ەل ەكونوميكاسىنىڭ ءتۇرلى سالالارىن سيفرلاندىرۋعا باعىتتالعان قازاقستان پرەزيدەنتىنىڭ بيىلعى جولداۋى اياسىندا ماڭىزدى ماسەلە بولىپ تابىلاتىندىعىن اتاپ ءوتتى. قازاقستاندىق ديپلومات «نۇرلى جول» جاڭا ەكونوميكالىق ساياساتى مەن قىتايلىق «جىبەك جولىنىڭ ەكونوميكالىق بەلدەۋى» اياسىندا قازاقستاندىق ەكولوگيالىق جاعىنان تازا اۋىل شارۋاشىلىعى ونىمدەرىن قىتاي نارىعىنا كىرگىزۋ ماسەلەسىنە باسا نازار اۋداردى.
سونىمەن قاتار ەكى ەلدىڭ قۇزىرلى ورگاندارىنىڭ جۇمىس تيىمدىلىگىن ارتتىرۋ، جەدەلدەتۋ وڭتايلاندىرۋ ماقساتىندا «قورعاس- شىعىس قاقپاسى» ە ە ا بازاسىندا «ق ت ج» ۇ ك» ا ق- نىڭ قىزمەتكەرلەرى مەن كەدەن، كارانتين ورگاندارى وكىلدەرى ءۇشىن كەشەندى قىزمەتتەردىڭ ىقپالداستىرىلعان پلاتفورماسىن قۇرۋ ماسەلەلەسى بويىنشا پىكىر الماسىلدى. اتالعان پلاتفورما قىتايدان ەۋروپاعا جانە كەرى قاراي جونەلتىلەتىن تاۋارلار سالىناتىن ءاربىر كونتەينەردەگى بوس ورىنداردى انىقتاۋعا مۇمكىندىك بەرەدى. ال بۇل ءوز كەزەگىندە بوس ورىنداردى ءتيىمدى تولىقتىرىپ، جۇكتى باراتىنا جەرىنە دەيىن تولىق باقىلاپ وتىرۋعا مۇمكىنىك جاسايدى.
ايتا كەتەيىك، «OBOR Cloud Network Technology Co.، Ltd» كومپانياسى ق ح ر- داعى الدىڭعى قاتارلى IT كومپانيالاردىڭ بىرىنەن سانالادى. ول قىتايدىڭ باس كەدەن، تاۋار ساپاسىن باقىلاۋشى ورگان، كارانتين ينپەكتسياسى، باسقارمالارى جانە قىتاي تەمىر جولى ءۇشىن باعدارلامالار ازىرلەيدى.
بۇعان قوسا كومپانيا قىتايداعى العاشقى ترانسشەكارالىق ەلەكتروندى كوممەرتسيا ءۇشىن العاشقى قويمانىڭ دايىنداۋشىسى بولىپ تابىلادى.
«Obor Cloud Network Technology Co.Ltd» كومپانياسىنىڭ شتاب-پاتەرى بەيجىڭدە ورنالاسقان جانە قىتايدىڭ بارلىق ايماعىندا، سونىمەن قاتار، قازاقستان، رەسەي، ۋكراينا، جاپونيا، وڭتۇستىك كورەيا، ءۇندىستان، يندونەزيا، كامبودجا سياقتى مەملەكەتتەردە ونىڭ فيليالدارى بار.
ستاتيستيكالىق مالىمەتتەرگە قاراعاندا، 2013-2016-جىلدار ارالىعىندا قىتايدىڭ ترانسشەكارالىق ەلەكتروندى ساۋداسىنىڭ كولەمى 1,8 تريلليون دوللاردى قۇراعان، ياعني جىلدىق ءوسىم 35 پروتسەنتتى قۇرايدى.
