قايرات ءابدىراحمانوۆ ق ر پرەزيدەنتى قاتىساتىن ب ۇ ۇ ق ك وتىرىسى جايىندا پىكىر ءبىلدىردى

استانا. قازاقپارات - ق ر سىرتقى ىستەر ءمينيسترى قايرات ءابدىراحمانوۆ «قازاقپارات» ح ا ا تىلشىسىنە ەلباسى نۇرسۇلتان نازاربايەۆتىڭ قاتىسۋىمەن وتەتىن ب ۇ ۇ قاۋىپسىزدىك كەڭەسىنىڭ الداعى وتىرىسىنا بايلانىستى ايتىپ بەردى، دەپ حابارلايدى قازاقپارات.

 «18 - قاڭتاردا پرەزيدەنت نۇرسۇلتان نازاربايەۆتىڭ قاتىسۋىمەن بولاتىن قاۋىپسىزدىك كەڭەسى وتىرىسىنىڭ تاقىرىبى «جاپپاي قىرىپ جويۋ قارۋىن تاراتپاۋ: سەنىم شارالارى» دەپ ايقىندالدى. ءبىز ءتوراعا رەتىندە وسى شارانىڭ تۇجىرىمداماسىن ۇسىندىق جانە ونى ق ك- ءنىڭ بارلىق مۇشەلەرى قولدادى. ونىڭ نەگىزىنە قازاقستان پرەزيدەنتىنىڭ ەكى قۇجاتى ەنگەن، ياعني «الەم. XXI عاسىر» مانيفەستى جانە «قاۋىپسىز، ءادىل جانە گۇلدەنگەن الەم قۇرۋ ءۇشىن جاھاندىق ارىپتەستىكتى نىعايتۋعا قازاقستاننىڭ تۇجىرىمدامالىق كوزقاراسى» اتتى ساياسي جولداۋى قامتىلدى. ماقسات - وڭىرلىك شيەلەنىستەر ءۇشىن ساياسي شەشىم تابۋ. وسى تۇرعىدا قارۋدى تاراتپاۋدىڭ سەنىم شارالارى سەنىمنىڭ باسقا دا ساياسي قادامدارىمەن قاتار ءجۇرۋى ءتيىس»، - دەدى مينيستر قازاقپارات تىلشىسىنە.

ونىڭ سوزىنە قاراعاندا، پىكىرتالاس بارىسىندا جاپپاي قىرىپ جويۋ قارۋىن تاراتپاۋدىڭ نەگىزگى ماسەلەلەرى ەگجەي- تەگجەيلى قارالاتىن بولادى.

ءمينيستردىڭ اتاپ وتۋىنشە، اتالعان شارا «شيەلەنىستى دوعارۋ»، «جاپپاي قىرىپ جويۋ قارۋىن تاراتپاۋ» جانە «سەنىم شارالارى» سەكىلدى ءۇش تاقىرىپتىڭ ءوزارا تاۋەلدىلىگى نەگىزىندە ۇسىنىستاردى قالىپتاستىرۋعا كومەكتەسەدى.

«ماسەلەنىڭ ءمانىسى جاپپاي قىرىپ جويۋ قارۋىن يەلەنۋ ءۇشىن ىنتالاندىرۋشى قادامداردى جويۋ بويىنشا ساياسي شارالاردىڭ كەڭ شوعىرىن ەسكەرەدى. بۇعان سەنىمنىڭ جوقتىعىنان الەمنىڭ ءتۇرلى ايماقتارىندا سوزىلمالى شيەلەنىستەر مەن داعدارىستاردى شەشۋ دە بايلانىستى بولىپ وتىر. ءتيىستى ناقتى مىندەتتەردى مۇشە مەملەكەتتەر الدىن الا جاريالاعان كەزدە، سەنىمنىڭ جاڭا شارالارى اتالعان قارۋدى تاراتپاۋ پروتسەسىنىڭ ءبىر بولىگى بولا الادى. تۇجىرىمداما يادرولىق جانە يادرولىق ەمەس مەملەكەتتەر اراسىندا ديالوگتى جاقسارتۋدى كوزدەيدى»، - دەپ ناقتىلادى قايرات ءابدىراحمانوۆ.

مۇنىمەن قوسا، اتالعان شارا سەنىم شارالارىن نىعايتۋدىڭ قادامى رەتىندە حالىقارالىق شارتتاردى امبەباپتاۋعا كومەكتەسەدى دەپ كۇتىلۋدە.

«بۇل رەتتە يادرولىق قارۋدى تاراتپاۋ تۋرالى شارتقا، يادرولىق سىناقتارعا جاپپاي تىيىم سالۋ شارتىنا، بيولوگيالىق جانە ۋلى قارۋدى قولدانۋعا تىيىم سالۋ تۋرالى كونۆەنتسياعا، حيميالىق قارۋعا تىيىم سالۋ كونۆەنتسياسىنا جانە باسقالارىنا قاتىستى بولىپ وتىر»، - دەپ ءتۇسىندىردى ول.

اۆتور: رۋسلان عابباسوۆ