الماتى وبلىسىنا ق ر پرەمەر- ءمينيسترىنىڭ ورىنباسارى اسقار جۇماعاليەۆ كەلدى
ساپار بارىسىندا ۇكىمەت باسشىسىنىڭ ورىنباسارى الدىمەن التىنكول ستانسياسى جۇمىسىمەن تانىستى. 250 گەكتار اۋماقتا 113 نىسان ورنالاسقان. بۇل جەردە تەمىر جولمەن كىرىپ شىعاتىن جۇكتەر راسىمدەلىپ، كەدەندىك باقىلاۋ جۇرگىزىلەدى. ءبىر جۇك پويەزىنا قىزمەت كورسەتۋ ۋاقىتى 3 ساعات 55 مينۋت.
اسقار قۋانىش ۇلى ق ت ج مەن ەلىمىزدىڭ كەدەن قىزمەتىنىڭ ءوزارا ىقپالداستىعىن جەتىلدىرىپ، ورىن الاتىن كەدەرگىلەردى بىرلەسىپ جويۋدى تاپسىردى. سونداي- اق، جۇك تاسىمالداۋ كەزىندەگى دەكلاراتسيا تولتىرۋدى سيفرلاندىرۋ مەن اۆتوماتتاندىرۋدىڭ جاڭا جۇيەسىن ءارى وسى قىزمەتتى پايدالانۋشىلار ءۇشىن بارىنشا جەڭىلدەتىلگەن باعدارلاماسىنا كوشىرۋدى قاراستىرۋ قاجەتتىلىگىن جەتكىزدى.
بۇدان كەيىن ۆيسە- پرەمەر قازاقستان- قىتاي شەكاراسىندا جاڭادان سالىنىپ جاتقان «نۇر جولى» كەدەن بەكەتىنىڭ قۇرىلىس جۇمىستارىن كورىپ شىقتى. ءدال وسى جەردە «باتىس ەۋروپا - باتىس قىتاي» اۆتوماگيسترالى قىتاي ەلىمەن تۇيىسەدى. بۇل زاماناۋي نىسان 2020 -جىلى اياقتالۋى ءتيىس.
اسقار جۇماعاليەۆ سونىمەن قاتار «قورعاس شىعىس قاقپاسى» ەركىن ەكونوميكالىق ايماعى، قورعاس حالىقارالىق شەكاراماڭى ىنتىماقتاستىق ورتالىعىندا، نۇركەنت قالاسىندا بولىپ قايتتى.
اۆتور: سامال قابىشيەۆا
